Hækkuðu verð í 10-11 á kvöldin og um helgar

Viðskipti Þrjár verslanir 10-11 hafa hækkað verð á vörum sínum eftir klukkan átta á kvöldin á virkum dögum og um helgar. Rafrænar verðmerkingar í hillum verslananna breytast á hverjum tíma. Verslanirnar sem um ræðir eru í Austurstræti, á Laugavegi og á Barónsstíg. Verð var hækkað í tveimur síðarnefndu um miðjan júní en í Austurstræti áttu breytingarnar sér stað í lok árs 2014. Þetta staðfestir Árni Pétur Jónsson, forstjóri 10-11, en hann segir aukið álag og hækkun rekstrarkostnaðar verslana í miðbænum vera ástæðu hækkunarinnar. Umrædd hækkun er að meðaltali átta prósent og var byrjað með að hækka aðeins verð á gosi, sælgæti og tóbaki. Í dag er álagið sett á töluvert fleiri vörur, meðal annars mjólkurvörur, heilsuvörur, niðursuðuvörur, bökunarvörur, barnamat, morgunmat, kaffi, pasta, orkudrykki og ávaxtasafa. Árni segir að það séu ekki áform um að taka kerfið upp í fleiri verslunum eða setja álag á fleiri vöruflokka. Teitur Atlason, varaformaður Neytendasamtakanna, segir breytingarnar glataðar. „Í fyrsta lagi finnst mér kurteisi að tilkynna svona breytingar. Það er hins vegar frjáls álagning í landinu og þeir neitendur sem kjósa að versla við okurbúllur versla bara við þær,“ segir Teitur og bætir við að Íslendingar ráði hvar þeir versli. Búðirnar sem um er að ræða eru allar í miðbæ Reykjavíkur og versla ferðamenn því eðlilega mikið við þær. „Svona háttalag mun eyðileggja orðspor Íslands sem ferðamannalands og mun þetta bíta okkur í bakið. Við eigum að vera góðir og sanngjarnir gestgjafar. Það er sorglegt að 10-11 sé einhvern veginn að taka af okkur orðsporið og koma óorði á íslenska verslun og það góða starf sem unnið hefur verið,“ segir Teitur, sem kveður verslunareigendur eiga að standa saman í að koma góðu orðspori á verslun í landinu. nadine@frettabladid.is