Hrafn fær 15 ár í viðbót

Hrafni Gunnlaugssyni eru heimil afnot af sumarbústaði sínum við Elliðavatn næstu 15 árin. Þetta er niðurstaða Héraðsdóms Reykjavíkur í máli Hrafns gegn Orkuveitu Reyjavíkur, sem vildi Hrafn og bústaðinn burt, en dómur var kveðinn upp í síðustu viku.

Húsið er eitt af 25 bústöðum við Elliðavatn sem Orkuveita Reykjavíkur hefur talið nauðsynlegt að hverfi á næstu árum vegna vatnsverndarsjónarmiða. Fjölskylda Hrafns hefur haft rétt til afnota af lóðinni frá 1927 og átt þar sumarhús frá 1960. Steinhúsið sem þar stendur nú er það nýjasta við vatnið því það var reist, með leyfi Reykjavíkurborgar, fyrir aðeins áratug eftir að eldra húsið brann.

Sjá einnig: Hrafni gert að hypja sig með sitt frá Elliðavatni

Haustið 2014 óskaði Hrafn eftir því að fá að byggja við bústaðinn en svörin voru heldur á aðra leið en hann hafði vænst. Honum var sagt að hann þyrfti að hafa sig í burtu og ekki stæði til að veita nein byggingarleyfi til viðbyggingar.

Höfðaði Hrafn því mál á hendur Orkuveitunni í október á síðasta ári og krafðist þess að fá ótímabundinn afnotarétt en til vara 75 ára rétt til afnota. Taldi hann sig eiga afnotarétt af lóðinni og snerist deila OR og Hrafns um hvort gerður hafi verið samningur um afnot húseigandans af landinu á grundvelli munnlegs vilyrðis þáverandi formanns stjórnar Orkuveitu Reykjavíkur, Alfreðs Þorsteinssonar.



Sjá einnig: „Ég veit ekki hversu harðan slag maður vill fara í“

Í yfirlýsingu Alfreðs, sem hann staðfesti fyrir dómi, segir að hann hafi viljað verða við beiðni Herdísar Þorvaldssdóttur, móðir Hrafns, um að afnotaréttur af bústaðinum og lóðinni yrði framlengdur svo hann næði til barna og barnabarna hennar.  Taldi Alfreð að Hjörleifur Kvaran, lögmaður OR, hefði gengið frá málinu á slíkan hátt.

Ekki var þó gengið frá málinu á formlegan hátt innan Orkuveitunnar en taldi Hrafn að með vilyrði Alfreðs hafi komst á samningur um afnotarétt sinn af lóðinni, þótt láðst hafi að ganga frá honum skriflega.

Orkuveitan hafði áður boðið þeim sem ættu hús í notkun og sæmilegu ásigkomulagi til viðræðna um lok afnota af þeim lóðum sem í nýtingu voru þannig að hægt væri að nýta lóðina þó innan ákveðinna tímamarka en þá yrðu húsin annaðhvort fjarlægð á kostnað OR eða þau rifin.

Í dómi Héraðsdóms segir að dómurinn fái ekki séð að unnt sé að gefa því vilyrði, sem Alfreð gaf Herdísi á sínum tíma, annað efni en þeim skriflegu samningum sem gerðir voru við aðra eigendur sumarhúsa á því landi sem Orkuveitan á við vatnið. Því geti afnotaréttur Hrafns af lóðinni ekki staðið lengur en í 15 ár. Hrafni er jafnframt óheimit að framselja þann afnotarétt og öll aðilaskipti að afnotum landsins eru bönnuð.