Stoppa þrælahald fótboltamanna í Rúmeníu

Barátta hundruða leikmanna í Rúmeníu er loksins að bera árangur og þeir sjá nú leið út úr slæmri stöðu hjá sínum félögum.

Um þrjú hundruð leikmenn hjá fjórtán gjaldþrota félögum í Rúmeníu eiga nú loksins möguleika á því að losna undan samningum sínum vegna vangoldinna launa.

Hingað til hafa þessir leikmenn verið flokkaðir sem eignir félaganna sem þýðir að þeir hafa verið fastir þegar félögin voru tekin til gjaldþrotaskipta.

Leikmannasamtökin í Rúmeníu, Afan, hafa barist gegn þessu þrælahaldi og það hefur borið þann árangur að lögunum í kringum greiðsluþrot hefur nú verð breytt.

Margar sorgarsögur eru í kringum þetta "þrælahald" fótboltamanna í Rúmeníu enda hefur leikmönnum gengið afar illa að innheimta launin sem þeir eiga inni.

BBC segir frá málinu og ræðir við breska knattspyrnumanninn  Rhema Obed sem lenti í því að fá ekki laun sín greidd þegar hann lék með Rapid Búkarest tímabilið 2013-14.

Rapid skuldar honum ennþá 40 þúsund pund í laun fyrir þá sjö mánuði sem hann var hjá félaginu sem gera rúmar sjö milljónir íslenskra króna.

„Þegar ég var nýkominn til félagsins þá fóru liðsfélagar mínir í verkfall og hótuðu því að spila ekki fyrr en þeir fengu launin sín. Fyrstu þrjá mánuðina þá beið ég það að borga leiguna, notaði það sem ég átti inn á banka og það sem kærastan fékk í laun. Þannig lifði ég," sagði Rhema Obed við BBC.

„Ég þurfti líka að hringja heim sem var vandræðalegt fyrir fótboltamann. Þetta var bara staðan og ég fékk að borða hjá mömmum eins liðsfélaga míns," sagði Rhema Obed sem var þá 22 ára gamall. Hann fór með málið til FIFA sem úrskurðaði honum í hag í október 2014.

Rhema Obed hefur enn ekki fengið peninginn frá Rapid Búkarest og FIFA er farið að hóta félaginu refsiaðgerðum bæti menn þar á bæ ekki úr því.

„Leikmenn urðu bara að þrælum þarna. Þetta er aðeins öðruvísi fyrir útlendinga en fyrir heimamenn þá er þetta vara nútíma þrælahald," sagði Rhema Obed.