Böðvar kallaður heim úr láni

Böðvar Böðvarsson er á leið aftur til Íslandsmeistara FH eftir stutta dvöl hjá Midtjylland í Danmörku. Þetta kemur fram á Fótbolta.net.

Böðvar, sem er 21 árs, fór á láni til dönsku meistaranna í febrúar og gilti samningurinn til loka tímabilsins þar í landi. FH nýtti sér hins vegar ákvæði í samningnum og kallaði Böðvar aftur heim.

Böðvar náði ekki að leika aðalliðsleik fyrir Midtjylland en hann hefur glímt við meiðsli að undanförnu. Óvíst er hvenær hann verður klár í slaginn að nýju en FH mætir Þrótti í 1. umferð Pepsi-deildarinnar á sunnudaginn.

Böðvar lék 19 leiki með FH síðasta sumar þegar liðið varð Íslandsmeistari í sjöunda sinn.