Real-menn nær sigri án Ronaldo

Manchester City og Real Madrid gerðu markalaust jafntefli í fyrri leik liðanna í undanúrslitum Meistaradeildar Evrópu á Etihad í kvöld.

Cristiano Ronaldo lék ekki með Real Madrid vegna meiðsla og þá vantaði Yaya Touré í lið City.

Leikurinn í kvöld var fremur bragðdaufur en gestirnir voru nær því að skora.

Real Madrid setti City undir pressu síðustu 20 mínútur leiksins. Varamaðurinn Jese Rodríguez skallaði fyrirgjöf Dani Carvajal í slána á 71. mínútu og þremur mínútum siðar átti Gareth Bale ágætis skot framhjá.

Joe Hart kom svo í tvígang í veg fyrir að Real Madrid næði forystunni. Fyrst varði hann vel skalla frá Casemiro á 78. mínútu og enn betur þremur mínútum síðar þegar Pepe átti skot af stuttu færi.

Kevin De Bruyne komst næst því að skora fyrir City í uppbótartíma en Keylor Navas sló skot hans beint úr aukaspyrnu yfir markið.

Seinni leikurinn fer fram á Santiago Bernabeu á miðvikudaginn í næstu viku.