Pepsi-spáin 2016: Víkingur Ó. hafnar í 11. sæti

Íþróttadeild 365 telur niður í Pepsi-deild karla með árlegri spá sinni. Íslandsmótið hefst 1. maí en þar á FH titil að verja eftir að verða meistari í sjöunda sinn í sögu félagsins.

Íþróttadeild 365 spáir Víkingi Ólafsvík ellefta sæti Pepsi-deildarinnar í sumar, en Ólsarar eru nýliðar í deildinni. Ólafsvíkingar eru að spila í efstu deild í annað sinn en þeir voru þar fyrst árið 2013. Þá höfnuðu þeir í ellefta sæti sem er jafnframt besti árangur liðsins í efstu deild Íslandsmótsins.

Þjálfari Ólsara er Bosníumaðurinn Ejub Purisevic sem er að þjálfa liðið öðru sinni. Hann þjálfaði liðið fyrst frá 2004 til 2008 en tók aftur við undir lok móts 2009. Síðari stjórnartíð hans hefur verið frábær en undir erfiðum kringumstæðum er hann búinn að koma Ólsurum tvívegis upp í Pepsi-deildina og einu sinni í undanúrslit bikarsins.

LÍKLEGT BYRJUNARLIÐ:

FYRSTU FIMM

Ólsarar eiga töluvert þægilegri byrjun fyrir höndum en hinir nýliðarnir. Fyrstu tveir leikirnir eru vissulega snúnir en eftir það koma leikir þar sem nýliðarnir geta vel hugsað sér að stela einhverjum stigum í byrjun móts. Vesturlandsslagurinn verður stórleikur í fjórðu umferð.

01. maí:  Breiðablik – Víkingur Ó., Kópavogsvöllur

08. maí: Víkingur Ó. – Valur, Ólafsvíkurvöllur

12. maí: ÍBV – Víkingur Ó., Hásteinsvöllur

16. maí: Víkingur Ó. – ÍA, Ólafsvíkurvöllur

22. maí: Fjölnir – Víkingur Ó., Fjölnisvöllur

ÞRÍR SEM VÍKINGUR Ó. TREYSTIR Á

Þorsteinn Már Ragnarsson: Týndi sonurinn er loksins kominn heim. Þorsteinn var nánast skrifaður úr KR á síðasta tímabili en hann kláraði sumarið og hafði svo úr nokkrum liðum að velja. Framherjinn eldfljóti og harðduglegi ákvað að fara heim og er orðinn að fyrirliða liðsins. Hann kemur með mikla reynslu úr Pepsi-deildinni og þarf vitaskuld að skora mörk fyrir nýliða ætli þeir að halda sér uppi. Nú fær hann tækifæri til að sanna hvað hann getur þegar hann spilar 90 mín í öllum leikjum.

Alfreð Már Hjaltalín: Þessi ungi hægri kantmaður, fæddur 1994, var ein af stjörnum 1. deildarinnar í fyrra. Hann spilaði 19 leiki í Pepsi-deildinni með Ólsurum fyrir þremur árum en hefur nú sprungið út sem fljótur og sterkur kantmaður. Hann skoraði tólf mörk í fyrra og átti stóran þátt í að koma liðinu upp um deild. Taki hann skrefið upp á við verður mjög spennandi að fylgjast með honum.

Tomasz Luba: Pólski miðvörðurinn hefur verið sem klettur í vörn Ólsara síðan 2010 þegar hann kom frá Reyni Sandgerði. Ólafsvíkingar eru hvað veikastir fyrir í varnarleiknum og hafa mestar áhyggjur af honum. Því verður Luba að standa sig en hann átti því miður ekki gott tímabil síðast þegar Ólsarar voru uppi. Nú verður hann að spila jafn vel og hann hefur gert í 1. deildinni.

MARKAÐURINN

Komnir:

Egill Jónsson frá KR

Pape Mamadou Faye frá BÍ/Bolungarvík

Pontus Nordenberg frá Svíþjóð

Þorsteinn Már Ragnarsson frá KR

Þórhallur Kári Knútsson frá Stjörnunni (lán)

Farnir:

Arnar Sveinn Geirsson í Fram

Brynjar Kristmundsson í Fram

Ingólfur Sigurðsson í Fram

Kristófer Eggertsson í HK

Guðmundur Reynir Gunnarsson úr láni

Gunnlaugur Hlynur Birgisson úr láni

Ólsarar hafa ýmislegt lært af veru sinni í Pepsi-deildinni síðast og voru því fljótir að endursemja við erlendu leikmennina sem spiluðu með liðinu í fyrra. Strákar á borð við markvörðinn Christian Martínez, miðjumanninn Kenan Turudija og framherjana William Dal Silva og Hrvoje Tokic sem skoraði tólf mörk í átta leikjum þegar hann kom vestur á miðju sumri í fyrra.

Hvort þessir leikmenn eru nógu góðir fyrir Pepsi-deildina á eftir að koma í ljós en Ólafsvíkingar gengu líka endanlega frá samningi við Egil Jónsson frá KR sem spilaði með þeim í fyrra, þá er Þorsteinn Már kominn heim og mjög spennandi ungur leikmaður, Þórhallur Kári Knútsson, er kominn frá Stjörnunni.

Vegna vandræða í varnarleiknum var Svíinn Pontus Nordenberg fenginn frá Svíþjóð en Ólsarar eru sagðir enn að leita að miðverði til að spila við hlið Tomaszar Luba. Christian Martinez sem varði markið í fyrra verður áfram á milli stanganna.

Til að fá meiri hraða og styrk í sóknarleikinn og auka breiddina er Pape Mamadou Faye kominn en hann spilar nú með öðru Víkingsliði í efstu deild. Pape hefur farið vel af stað með Ólsurum á undirbúningstímabilinu og hentar vel inn í skipulag Ejubs Purisevic.

Ólsarar hafa frekar styrkt liðið heldur en annað. Fjórir leikmenn sem yfirgáfu það verða áfram í 1. deildinni. Sá sem þeir sakna mest er besti leikmaður síðustu leiktíðar í 1. deildinni, Guðmundur Reynir Gunnarsson.

HVAÐ SEGIR HJÖRVAR HAFLIÐASON?

Það sem varð Ólsurum að falli 2013 var ömurleg byrjun á mótinu. Það er engin aðstaða til fótboltaiðkunar á Ólafsvík á veturna.

Markmannsmálin voru í tómu tjóni í upphafi síðast en nú vonast þeir til að vera með alvöru mann í búrinu.

Christian Martinez, markvörður, Þorsteinn már og Tokic eru þeirra lykilmenn. Tokic skoraði tólf mörk í bara átta leikjum í fyrra.

Þessir þrír verða að standa undir væntingum ef Ólsarar ætla að halda sér uppi.

Það sem við vitum um Víking Ó. er... að liðið er afskaplega vel skipulagt undir stjórn hins afar taktíska Ejubs Purisevic. Það verður erfitt að brjóta Ólsara niður og ef illa fer að ganga mun Ejub múra fyrir markið eins og honum einum er lagið. Liðið nýtur mikils stuðnings heimamanna og Ejub fær alltaf að bæta við liðið ef það verður í vondum málum um mitt mót. Ólsarar eru með mjög fljóta og sterka framlínu sem hjálpar því að sækja hratt sem verður líklega aðalsmerki liðsins.

Spurningamerkin eru... sérstaklega varnarleikurinn og markvarslan. Martínez var flottur í 1. deildinni í fyrra en sparkspekingar eru ekki vissir um að hann geti tekið skrefið upp í efstu deild. Ólsarar eru enn að leita að miðverði og jafnvel öðrum varnarmanni til. Þó erlendu leikmennirnir hafi verið flottir í fyrra er ekki víst að þeir skili jafngóðu verki í Pepsi-deildinni.

Í BESTA FALLI:

Verða erlendu leikmennirnir frábærir eins og í fyrra og Tokic sannar að hann getur skorað mörk í hvaða deild sem er. Þorsteinn Már sýnir hvað hann getur og leiðir liðið áfram. Alfreð Hjaltalín springur út og liðið nær að verjast. Gangi þetta upp er ekkert útilokað að Ólafsvíkingar haldi sæti sínu í efstu deild.

Í VERSTA FALLI:

Eru erlendu leikmennirnir bara 1. deildar spilarar og Ejub þarf að fara að róta í liðinu um mitt sumar. Byrjunin verður erfið og þar með verða Ólsarar of langt á eftir eins og gerðist síðast. Liðið nær ekki að skora mörk og er að tapa naumt eins og fyrir þremur árum. Þetta er uppskrift Ólsara að falli aftur í 1. deildina.