Eigandi Leeds bannaði stjóranum að fara í viðtal eftir tapleik

Steve Evans, knattspyrnustjóri Leeds, fékk ekki að ræða við fjölmiðla eftir skammarlegt 4-0 tap liðsins gegn Brighton í ensku B-deildinni í fótbolta í gærkvöldi.

Massimo Cellino, hinn skrautlegi ítalski eigandi og stjórnarformaður liðsins, bannaði Evans að fara í viðtöl, en sjálfur yfirgaf Cellino völlinn í hálfleik.

Leeds var 4-0 undir í hálfleik, en Brighton skoraði fyrsta markið á 18. mínútu og lét svo rigna inn mörkum næstu 20 mínúturnar.

Evans, sem stýrði áður Kára Árnasyni hjá Rotherham í þrjú ár, er mikill vélbyssukjaftur og því var mögulega skynsamlegt hjá Ítalanum að halda honum frá fjölmiðlum eftir leikinn.

Paul Raynor, aðstoðarmaður Evans, var sendur í viðtölin eftir leik og þurfti að svara fyrir frammistöðu liðsins sem hefur nú aðeins unnið einn af síðustu ellefu leikjum sínum.

„Við vitum að þið spyrjið spurninga og við vitum að þið þurfið svör,“ sagði Raynor aðspurður hvers vegna Evans væri ekki mættur sjálfur í viðtöl.

„Við ætlum að reyna að gefa leikmönnunum svör við því hversu ömurlegur okkur fannst fyrri hálfleikurinn vera. Hann var algjörlega til skammar og svo sannarlega ekki nógu góður fyrir Leeds United,“ sagði Paul Raynor.

Leeds er eftir tapið í 17. sæti deildarinnar með 38 stig, níu stigum frá fallsvæðinu.