Hefur bjargað hundruðum mannslífa

TF-Líf lenti við bráðamóttökuna í Fossvogi í dag þegar þess var minnst að 30 ár eru liðin síðan samstarfsamningur var gerður milli Landhelgisgæslunnar og Borgarspítalans.

Benóný Ásgrímsson flugstjóri hjá Landhelgisgæslunni hefur flogið þyrlunni öll árin 30 og átta árin betur. Hann segir að þegar læknarnir komu til sögunnar hafi það gjörbreytt starfinu og bætt öryggi bæði sjúklinga en einnig starfsmanna Landhelgisgæslunnar.

Aldrei skilið læknana sem fást í þetta

„Árin þar á undan áður en þeir komu til starfa höfðum við enga sérþekkingu um borð en vorum oft í því að sækja sjúklinga og slasaða. Og það eina sem við höfðum í höndunum var eiginlega bara lækningahandbók fyrir sjómenn eftir Pál Kolka héraðslækni. Það var meira til að stoppa blóðnasir og slíks. Þetta gjörbreytti öllu."

Benóný segir samstarfið við lækna einstakt og það hafi margsannað sig gegnum tíðina. „En ég hef reyndar aldrei getað skilið það með læknana hvernig þeir fást í þetta starf. Þeir sem eru í tiltöllega öruggu og rólegu...jah ég segi kannski ekki rólegu, en öruggu umhverfi inni á spítölunum. Að láta slaka sér ofan í skip í leiðindaveðri í svartamyrkri. Ég hugsaði alltaf með mér fyrst að eftir þetta hlytur þessir unglæknar að fara beint á geðsviðið í sérnám.“

Lærði að óttast ekkert

Guðmundur Björnsson var einn af unglæknunum sem áttu frumkvæði að því að setja á sjálfstæða læknavakt um borð í þyrlunum. Þetta var hugsjónastarf því framan af þetta sjálfboðavinna. Hann segir margt minnisstætt úr sjúkrafluginu.

„Þetta kenndi allavega mér að taka erfiðar ákvarðanir, þreyttur um miðja nótt, og gerði mann þannig að maður er raunverulega ekki hræddur við neitt," segir Guðmundur.

Bjargar lífum á hverju ári

Álagið hefur síst minnkað því útköllum þyrlunnar fer fjölgandi með auknum ferðamannastraum. Í fyrra voru farin hátt í þriðja hundruð sjúkraflug, oft á afskekkta staði þar sem áhöfn þyrlunnar er fyrsta hjálp á vettvangi. Bergur Stefánsson er yfirlæknir bráðaþjónustu utan sjúkrahúsa. Hann segir lækninn ómissandi fyrir sjúkraflugið í dag, „en auðvitað getum við ekkert gert án þess að hafa stuðninginn frá strákunum í gæslunni.

„Þetta er einn hlekkurinn í keðju, en ef einn hlekkur er veikur þá slitnar keðjan. Þetta er sterkur hlekkur í keðjunni og við verðum að halda áfram að hafa hann sterkan. Þetta bjargar lífum á hverju einasta ári."