Blandaður sparnaður í áskrift

Það getur verið erfitt að spara. Mikilvægast er að taka ákvörðun um að byrja að spara og setja upp tímaplan. Erfiðara getur reynst að meta með hvaða hætti best sé að fjárfesta. Blandaðir sjóðir nýta þau tækifæri sem skapast hverju sinni á fjármálamarkaði, en mismunandi fjárfestingakostir henta á mismunandi tímum í efnahagssveiflunni. Margir velja þann kost að vera í mánaðarlegri sparnaðaráskrift.

Það er erfitt að tímasetja markaði, margir segja að það sé ómögulegt. Skynsamlegt er því að fjárfesta með reglubundnum hætti í blönduðu safni verðbréfa yfir lengra tímabil. Einfaldasta leiðin til þess er að fjárfesta í blönduðum sjóðum, en þeir geta fjárfest í skuldabréfum og innlendum og erlendum hlutabréfum, auk sérhæfðra fjárfestinga líkt og lífeyrissjóðir geta gert.

Allir innlendir fjárfestar hafa getað tekið þátt í þeim almennu hlutafjárútboðum sem fram hafa farið á síðustu árum. Þetta hafa verðbréfa- og fjárfestingasjóðir til að mynda gert, ekki síst sjóðir Stefnis hf., og þannig tekið þátt í því að endurreisa fjármálamarkaðinn af miklum krafti. Þúsundir Íslendinga sem eru í áskrift hjá þessum sjóðum hafa notið góðs af þessu. Með vaxandi kaupmætti gefst fólki kostur á að „eyða“ meira í sparnað og taka ríkari þátt í þessari uppbyggingu sem er að margra mati nýhafin.

Stefnir er stærsta sjóðastýringarfyrirtæki landsins með um 400 milljarða í stýringu. Þar af eru sex blandaðir fjárfestingasjóðir. Slíkir sjóðir hafa verið í mikilli sókn sem sparnaðarform og eru nú reknir af nánast öllum sjóðastýringarfyrirtækjunum. Flestir hlutdeildarskírteinishafar eru í Stefni-Samvali, en sjóðurinn verður 20 ára á þessu ári. Í honum eru rúmlega 4.000 manns og fimmtungur þeirra kýs að spara mánaðarlega með áskrift í sjóðnum. Á síðustu fimm árum hefur ávöxtun verið að meðaltali 16,4% á ári. Stefnir- Eignastýringarsjóður, elsti verðbréfasjóður landsins, er einnig í flokki blandaðra sjóða en hann verður þrjátíu ára á árinu.

Báðir sjóðir sluppu við stóráföll í bankahruninu, enda geta slíkir sjóðir farið inn og út úr hlutabréfum. Blandaðir sjóðir geta því verið afar góður kostur fyrir reglulegan langtímasparnað einstaklinga.