Ranieri: Ég var ráðinn til að taka áhættur

Leicester heldur tveggja stiga forskoti á toppi ensku úrvalsdeildarinnar eftir 27 umferðir, en liðið lagði nýliða Norwich, 1-0, um helgina.

Refunum gekk illa að koma boltanum í netið á móti Norwich en undir lok leiksins gerði Claudio Ranieri, knattspyrnustjóri Leicester, breytingu sem átti eftir að skipta sköpum.

Hann tók þá áhættu að taka bakvörðinn Daniel Amartey af velli og setja inn á framherjann Leonardo Ulloa. Það margborgaði sig því Ulloa skoraði sigurmarkið á 89. mínútu.

„Ég tók fullt af áhættum. Eitt stig gerir ekkert fyrir okkur í þessari baráttu sem við erum í. Við verðum að vinna,“ segir Ranieri.

„Það er alveg eins hægt að tapa því það er bara einu stigi minna en jafntefli. Við tókum áhættur en til þess eru knattspyrnustjórar ráðnir. Þeir eiga að taka áhættur,“ segir Claudio Ranieri.

Leicester mætir WBA annað kvöld, en heil umferð fer fram í ensku úrvalsdeildinni í kvöld og á morgun.