Kvarta undan reglu um skil og gömlum lager

Helstu kvartanirnar sem Neytendasamtökunum berast þessa dagana eru vegna þess að ekki hefur náðst að skipta jólagjöfum áður en útsölurnar byrjuðu, að því er Sigurlína Sigurðardóttir, starfsmaður samtakanna, greinir frá.

„Það getur flækt málin þegar útsölur byrja strax eftir jól og einhverjir eiga eftir að skila eða skipta jólagjöfum. Þá þurfa viðskiptavinir að hafa í huga að þeir eiga rétt á inneignarnótu sem miðar við upprunalegt verð vörunnar en inneignarnótu sem gefin er út innan 14 daga fyrir útsölu eða á meðan útsala stendur yfir er ekki heimilt að nota á útsölu nema með samþykki seljanda,“ tekur hún fram.

Sigurlína bendir á að í raun sé enginn lögbundinn skilaréttur á Íslandi nema vara sé gölluð. „Iðnaðar- og viðskiptaráðuneytið gaf út verklagsreglur fyrir nokkrum árum um skilarétt, inneignarnótur og gjafabréf til að koma til móts við kröfu neytenda og verslana um formfastar reglur. Þessar reglur eru leiðbeinandi og verslunum er þess vegna ekki skylt að fara eftir þeim. Seljendur geta sett sínar eigin reglur um skilarétt og ættu neytendur að kynna sér vel hvaða reglur verslunin hefur sett um skilarétt áður en vara er keypt.“

Hún getur þess að samkvæmt fyrrgreindum verklagsreglum gildi útsöluverð við skil eða skipti vöru sé hún keypt rétt fyrir útsölu. „Fólk áttar sig ekki alltaf á að þá getur það óskað eftir inneignarnótu sem miðar við upprunalegt verð.“

Neytendasamtökunum berast einnig kvartanir vegna gamalla lagera sem settir eru fram í verslanir þegar útsala er. Oft er um að ræða vörur sem þeir hafa aldrei séð í viðkomandi verslun áður. „Slíkar kvartanir koma alltaf annað slagið inn. Það er ekkert óeðlilegt við sölu á gömlum lagerum. Verslunin tekur sjálf slíka ákvörðun en viðskiptavinurinn er náttúrlega viðskiptavild verslunarinnar. Ef seljendur vilja hafa fjölbreyttan hóp viðskiptavina verða þeir að sinna þeim. Það er ekkert flóknara en það.“

Seljandi þarf að geta sannað að vara hafi í raun verið seld á því verði sem gefið er upp sem fyrra verð. Ekki er heimilt að hækka verð við upphaf útsölu til að blekkja neytendur. Eftir sex vikur á útsölu telst útsöluverð vera orðið almennt verð og lækka þarf þá verðið aftur ef varan á enn að vera á útsölu. Telji neytendur að þessar reglur séu brotnar geta þeir sent upplýsingar um það til Neytendastofu.