Jóhann kveður Hafró: „Óhætt að segja að starfsfólkið og Íslendingar hafi náð mjög miklum árangri“

Jóhann Sigurjónsson mun láta af störfum forstjóra Hafrannsóknarstofnunarinnar þann 1. apríl næstkomandi eftir rúmlega sautján ár í embættinu. Jóhann mun þá hefja störf í utanríkisráðuneytinu þar sem hann mun gegna stöðu sérstaks erindreka íslenskra stjórnvalda varðandi málefni hafsins.

Jóhann segir í samtali við Vísi að nýja starfið leggist mjög vel í sig og að hann hlakki til að takast á við ný verkefni. „Þarna gefst manni tækifæri til að nota sína þekkingu og reynslu á öðrum vettvangi. Þetta eru svolítið aðrar aðstæður heldur en við sjálft rannsóknarstarfið.“

Þörf á að styrkja fyrirsvar og málatilbúnað Íslands

Jóhann segir að tilkoma nýju stöðunnar hafi helgast af því að mönnum hafi þótt þörf á að styrkja fyrirsvar og málatilbúnað Íslands á sviði málefna hafsins. „Það hafa orðið svo miklar breytingar í norðurhöfum á síðustu tuttugu árum eða svo, þar sem lífríkið hefur stórlega breyst. Við sjáum það með göngur og stærð fiskistofna á borð við makríkinn. Afleiðingar hafa kallað á ýmsar breytingar með tilliti til stjórnunar og samkomulags um veiðar á þessum stofnum.

Síðan hafa líka orðið miklar og hraðari breytingar varðandi hlýnun hafsins og á norðurslóðum. Allt í einu eru þessi norðurslóðamál mjög í brennidepli. Þau snúa einnig að málefnum hafsins – meðal annars hvernig menn ætli að vernda lífríki og nytjastofna á norðurslóð og hvernig eigi að stjórna málum.“

Ábyrgð Íslendinga er mikil

Jóhann segir Íslendinga bera mikla ábyrgð þegar kemur að þessum málum auk þess að þarna séu miklir hagsmunir í húfi og ógnanir sem þarf að bregðast við. „Umhverfismál hafsins eru líka mjög mikilvæg og vaxandi og er snar þáttur í markaðssetningu á sjávarafurðum.

Það er mikilvægt að við séum með stefnufestu og ábyrgð á því sviði. Það er mikilvægt að við Íslendingar stöndum okkur vel og þetta er nýnæmi að ráðuneytin fjögur sem koma að þessum málum hafi nú komið á formlegum vettvangi til að samhæfa og samræma kraftana. Slíkt sé nauðsynlegt þar sem unnið sé á fjölmörgum „frontum“ þegar kemur að málefnum hafsins,“ segir Jóhann.

En hvernig er að kveðja Hafró?

„Auðvitað eru það blendnar tilfinningar. Ég er óskaplega þakklátur að hafa fengið að starfa við þessi áhugaverðu málefni sem Hafrannsóknarstofnunin stendur fyrir. Það er mikið af fólki sem hér starfar og ég hugsa að það sé óhætt að segja að starfsfólkið og við Íslendingar höfum náð mjög miklum árangri á þessu sviði. Maður kveður sáttur og með þakklæti að hafa tekið þátt í þessu,“ segir Jóhann.

Samruni tveggja stofnana

Samruni tveggja stofnana , Hafrannsóknarstofnunar og Veiðimálastofnunar, stendur nú fyrir dyrum og segir Jóhann að staða forstjóra nýrrar stofnunar – Hafrannsóknastofnunar, rannsókna- og ráðgjafastofnunar hafs og vatna – verði auglýst á næstu dögum.

„Ég mun að sjálfsögðu verða nýjum forstjóra innan handar og stuðla að því að allt komist sem öruggast í hendur hans,“ segir Jóhann.

Nýja stofnunin tekur formlega til starfa 1. júlí næstkomandi, en forstjóri verður ráðinn til starfa nokkru fyrr.