Frávísunartillaga Bjartrar framtíðar á búvörusamninga felld

Frávísunartillaga Bjartrar framtíðar var felld á Alþingi í dag. Samningarnir voru samþykktir í atkvæðagreiðslu að lokinni annarri umræðu og ganga nú til þriðju umræðu. Óttarr Proppé, formaður Bjartrar framtíðar, segir það óskiljanlegt að ætla fyrst að samþykkja samningana og hafa samráðið svo.

„Það er tortryggilegt að hér sé verið að keyra í gegn samning sem mjög margir hér virðast sammála um að sé ófullkominn –og þó að það þurfi mikilla breytinga við. Breytingatillögur atvinnuveganefndar eru í rétta átt þó þær gangi alls ekki nógu langt. Í meirihlutaálitinu eru góð orð um að auka samráð og svo framvegis en það er algjörlega óskiljanlegt af hverju það á að byrja á að samþykkja og taka samráð svo,“ sagði Óttarr á Alþingi í dag.

Þrjátíu og sjö þingmenn felldu tillöguna en það voru þingmenn Samfylkingar, Framsóknar og Vinstri grænna. Tíu þingmenn frá Samfylkingu, Bjartri Framtíð og Pírötum greiddu atkvæði með henni og þrír þingmenn sátu hjá; Sigríður Á. Andersen, þingmaður Sjálfstæðisflokks og Píratarnir Helgi Hrafn Gunnarsson og Ásta Guðrún Helgadóttir.

„Í ljósi þess að frávísunartillagan var felld illu heilli af meirihluta þingmanna þá lítum við svo á að þrjú ár af vondum samningi séu skárri heldur en tíu ár af vondum samningi. Við munum því styðja þessar breytingar,“ sagði Óttarr Proppé.