Tilbúnir til að ráða Kim Jong Un af dögum

Yfirvöld Suður-Kóreu eru tilbúin til að ráða Kim Jong Un, einræðisherra Norður-Kóreu af dögum með litlum fyrirvara komi til stríðs á Kóreuskaganum. Varnarmálaráðherra landsins tilkynnti þetta á þinginu í gær þegar hann var spurður hvort að ríkið hefði undirbúið áætlun til að ráða einræðisherran af dögum.

Han Min-koo bætti við að Suður-Kórea hafi undirbúið varnaráætlun sem feli í sér að ráða æðstu leiðtoga nágranna sinna af dögum komi til styrjaldar.

Sjá einnig: Tilbúnir til að gereyða Pyongyang

Samkvæmt CNN hefur lengi verið talið að áðurnefnd áætlun hafi verið til og hefur vakið furðu hve hreinskilinn Varnarmálaráðherrann var á þinginu.

Utanríkisráðherra kallaði í gær eftir því að vera Norður-Kóreu í Sameinuðu þjóðunum yrði endurskoðuð. Yun Byung-se sagði yfirvöld Norður-Kóreu gera lítið úr áhrifum Sameinuðu þjóðanna með kjarnorkuvopna- og eldflaugatilraunum sínum. Þetta sagði ráðherrann á allsherjarþingi Sameinuðu þjóðanna í gær.

Spennan hefur stigmagnast á Kóreuskaga eftir fimmtu kjarnorkuvopnasprengingu Norður-Kóreu og síendurteknar tilraunir með eldflaugar. Til stendur að herða viðskiptaþvinganir gegn Norður-Kóreu, en yfirvöld þar hafa þegar sagt að hótanir um hertar þvinganir séu hlægilegar.