Fleiri marglyttur í Nauthólsvík en áður - myndband

Risamarglyttur hafa hreiðrað um sig í Nauthólsvík og haft töluverð áhrif á sundfólk. Hér að ofan má sjá syndandi marglyttur í sjónum við Nauthólsvík í dag. 

Lillý Valgerður Pétursdóttir, fréttamaður Stöðvar 2, hélt í Nauthólsvík í fréttatíma kvöldsins en marglyttur hafa fundist víðsvegar í víkinni í sumar.

„Þetta er meira en verið hefur áður. Fólk er að finna fyrir því,“ segir Dögg Gunnarsdóttir, starfsmaður ylstrandarinnar, í fréttatímanum. „Þetta er misjafnt eftir dögum.“ Dögg segir að þannig geti það verið stundum þannig að suma daga brenni sig margir og aðra daga brenni sig enginn á marglyttunum.

„Það var eitt tilfelli sem var slæmt.“ Þurfti þá að hringja á sjúkrabíl.

Guðjón Már Sigurðsson, sjávarlíffræðingur, segir tvær tegundir algengastar, annars vegar bláglytta og hins vegar brennihvelja. „Bláglyttan þekkist af því að hún er svona ljósblá eða hvít með fjórum hringjum. Frekar smáar eða svona á stærð við hamborgara,“ útskýrði Guðjón. 

Hann segir þessa tegund af marglyttum alveg skaðlausa. „Þessi tegund hefur verið algeng í Nauthólsvík áður.“ 

Hin tegundin, brennihvelja, er hættulegri en hún getur skaðað mannfólk. 

„Hún hefur ekki fundist í miklu magni í Nauthólsvík. Sú er stærri, svona á stærð við góða pítsu.“ Þá getur brennihveljan orðið allt að 37 metra löng en það er hálf Hallgrímskirkja og stærri en steypireyður. 

Það er líka réttast að taka það fram, fyrst við erum að fjalla um marglyttur, að það er algeng mýta að það slái á sársaukann eftir marglyttustungu að pissa á svæðið sem er aumt. Þetta virkar ekki - þvag hefur ekki efnin sem þarf til þess að slá á sársaukann. Það er betra að hella á svæðið saltvatni eða ediki.