Páll Óskar heldur upp á miðlungsafmæli

„Loksins náðist að opna sýninguna,“ segir Páll Óskar, en í gær var opnuð sýning hans í Rokksafninu í Reykjanesbæ. Upphaflega stóð til að opna hana á laugardaginn en sökum veðurs var ákveðið að bíða með opnunina.

Sýningin er nokkurs konar yfirlitssýning um líf Palla en henni er skipt niður eftir tímabilum. Þar má berja augum búninga sem hann hefur klæðst á ferlinum, úrklippur úr gömlum dagblöðum, teikningar, dagatöl og að ógleymdum Nokia 6110-símanum sem hann átti lengur en góðu hófi gegndi.

Í dag, á afmælisdaginn sjálfan, hefur Palli hins vegar í hyggju að bjóða nánasta skyldfólki sínu í mat heim til sín. „Og það er sko ekkert grín,“ segir afmælisbarnið. Páll er yngstur sjö systkina og þegar búið er að bjóða systkinum, mökum þeirra og afkomendum auk viðhengja og barna þeirra, telur hópurinn alls 33.

„Ég nýt þeirrar blessunar að Ásdís, elsta systir mín, starfar sem kokkur og hún ætlar að elda lambapottrétt ofan í liðið í einhverjum tröllapotti. Það fellur síðan í minn hlut að búa til forláta kartöflustöppu í meðlæti,“ segir Páll. „Okkur hlýtur að takast það að koma öllum fyrir í íbúðinni minni.“

Spurður hvort hann sé mikið afmælisbarn, samanber það að vera jólabarn, segir Páll að yfirleitt láti hann sér nægja að bjóða sínum allra nánustu vinum í mat, spjall og spil. „En þar sem þetta er nú svona miðlungsafmæli þá er allt í lagi að bjóða stórfjölskyldunni.“

Fyrir fimm árum hélt Palli upp á eftirminnilegasta afmælið sitt, en þá varð hann fertugur. Herlegheitin fóru fram á Nasa og Hemmi Gunn var veislustjóri. Meðal þeirra sem komu fram voru Baggalútsmenn, Brynhildur Björnsdóttir leikkona hélt ræðu og kvöldinu var svo slúttað með heljarinnar dansleik þar sem Palli sá um tónlistina.

„Þetta tókst frábærlega upp þá. Það komu um sjö hundruð manns sem var allt frábært fólk sem ég hef kynnst í gegnum tíðina,“ segir Páll, en bætir við að það sé ekki hægt að hafa slíka veislu í hvert einasta skipti.

Sýning Páls verður áfram opin í Hljómahöllinni og áhugasamir geta sótt sér plötur hans inn á palloskar.is.