Óttinn rekinn á brott

Ótti er orð sem margir hræðast enda ekki að ástæðulausu. Hann er oft á tíðum grunnur að því hvernig við sjáum okkur sjálf, hvernig við tökum ákvarðanir og hvað við gerum. Hvernig getur þetta litla stílhreina orð valdið svona miklum usla í lífi hvers manns og hvað er það í rauninni sem við óttumst þegar allt kemur til alls? Ótti á sér margar hliðar og búninga til skiptanna, hann getur komið fram sem stjórnsemi þar sem viðkomandi sem klæðist búningnum finnur sig knúinn til að stjórna öllum mögulegum aðstæðum þar sem hann óttast endanlegu útkomuna. Ótti getur komið fram sem stress og streita, við óttumst að standa okkur ekki, gera hlutina ekki nægilega vel. Út frá búningunum höfnun og gagnrýni stöndum við okkur að því að halda aftur af orðum okkar og segja ekki hvað í hjarta okkar býr. Ótti er einnig undirstaðan í meðvirkni, við samþykkjum að gera hluti sem við viljum í rauninni ekki gera. Óttinn kemur víða við og lætur engan ósnortinn. Fyrsta skrefið til þess að losna undan óttanum er að vera meðvitaður um það hvar hann stingur sér niður í lífi þínu. Kannast þú við einhverja af þessum búningum sem ég nefndi hér að ofan? Annað skrefið er að vera þakklátur og finna fyrir kærleikstilfinningu. Lokaðu augunum og hugsaðu um einhvern sem þér þykir vænt um og finndu hlýjuna sem fer um líkamann. Þakkaðu fyrir það sem þú hefur í lífinu og einbeittu þér að því. Þriðja skrefið er að hugleiða. Þú getur leitt markmið og hugmyndir inn í hugleiðsluna þína. Sjáðu fyrir þér bestu mögulega útkomu fyrir þig. Hugleiðsla hefur einnig róandi áhrif á hugann og hugsanir skýrast í kjölfarið. Í fjórða skrefinu liggur traust, treystu því að allt fari á besta veg. Þú hefur ekkert að óttast og getur miklu meira en þú heldur. Fimmta skrefið felur í sér að umkringja þig jákvæðu og hvetjandi fólki, fólki sem hefur trú á þér og ber hag þinn fyrir brjósti.