Myrtur eftir PEGIDA-fund

Í kjölfar árásanna í París í síðustu viku birtust rótarskot hreyfingarinnar víðs vegar um Evrópu. Meðlimir hreyfingarinnar hafa látið andúð sína á íslam í ljós á hverjum mánudegi síðan í október og hafa aldrei verið fleiri en síðasta mánudag. Helsta vígi samtakanna er í Dresden en morguninn eftir síðasta fund þar í borg fannst tvítugur erítreskur hælisleitandi stunginn til bana.

Maðurinn fannst látinn skammt frá heimili sínu á þriðjudagsmorgni. Hann hafði hlotið stungusár á hálsi og brjósti sem drógu hann til dauða. Lögreglurannsókn hófst á miðvikudag og munu ríflega tuttugu lögreglumenn annast hana.

Patriotische Europäer gegen die Islamisierung des Abendlandes (PEGIDA), eða Þjóðræknir Evrópubúar gegn auknum áhrifum íslams á Vesturlöndum eins og það útleggst á hinu ylhýra, eru samtök sem stofnuð voru í október síðastliðnum í Dresden í Þýskalandi.

Á fyrsta fund samtakanna í október mættu um 350 manns en á mánudag er talið að minnst 25.000 manns hafi verið samankomnir í Dresden. Fundir fóru einnig fram víðar um Þýskaland og telja yfirvöld að yfir 100.000 hafi sýnt málstaðnum stuðning. Í Leipzig voru um fjögur þúsund manns samankomin en í Berlín mættu aðeins um fjögur hundruð og hópurinn í München var enn fámennari. Á öllum þessum stöðum voru allt að tífalt stærri hópar komnir saman sem mótmæltu afstöðu PEGIDA.

Teygir anga sína um álfuna

Á samskiptamiðlinum Facebook má finna rótarskot samtakanna í mörgum löndum Evrópu, til að mynda í Sviss, á Íslandi og í Danmörku. 

„Við höfum fylgst með þýsku hreyfingunni í umtalsverða stund og séð að hún er jákvæð og friðsamleg,“ segir Nicolai Sennels, stofnandi PEGIDA í Danmörku. Fyrsta gangan í Kaupmannahöfn mun fara fram næstkomandi mánudag. Sennels segist hafa verið í sambandi við lögregluyfirvöld og þau hafi fullvissað hann um að meðlimum verði engin hætta búin af öfgafullum vinstrimönnum. Jafnframt hefur verið tekið fram að rasistar og nýnasistar séu ekki velkomnir í gönguna.

„Allir sem ráðast gegn múslimum eða moskum munu verða sóttir til saka og látnir bera ábyrgð á gjörðum sínum. Sem kanslari þessa lands mun ég verja múslima sem best ég get,“ segir Angela Merkel. Borið hefur á óánægju innan hennar eigin flokks, Kristilegra demókrata, sem telja að hún hafi menningu og uppruna Þýskalands ekki í nógu miklum hávegum.

Um heim allan fylgist fólk með litlum hluta Þjóðverja daðra við söguna og vona að sömu mistök endurtaki sig ekki.