Íslenskir leikmenn í minnihluta í leik KR og FH í 1. umferð?

Víðir Sigurðsson, blaðamaður á Morgunblaðinu, skrifar í dag athyglisverða grein um erlenda leikmenn í liðum KR og FH og bendir á möguleikann á því að 13 af 22 byrjunarliðsleikmönnum í stórleik liðanna í fyrstu umferð Pepsi-deildar karla gætu verið erlendir leikmenn.

KR samdi við sjötta erlenda leikmanninn í gær en danski miðjumaðurinn Jacob Schoop er þriðji Daninn sem KR-ingar fá til sín fyrir tímabilið. Áður höfðu þeir Rasmus Christiansen og Sören Frederiksen samið við Vesturbæjarliðið.

KR-ingar geta þó aðeins notað fimm af þessum sex leikmönnum í fyrstu umferðinni því Tógómaðurinn Farid Zato er meiddur og óvíst hvenær hann verður leikfær á ný.

FH-ingar eru með sjö erlenda leikmenn innan sinna raða en aðeins sex þeirra geta þó spilað í fyrstu umferðinni því Malí-maðurinn Kassim Doumbia tekur út leikbann í umræddum leik.

FH hefur bætt við sig Jeremy Serwy frá Belgíu og Amath André Diedhiou frá Senegal auk þess að Samuel Lee Tillen er farinn að spila aftur eftir erfið meiðsli.

11 af 22 leikmönnum liðanna í þessum fyrsta leik tímabilsins gætu því verið erlendir og það þarf ekki nema einn útlending í viðbót svo að möguleikinn opnist fyrir því að íslenskir leikmenn verði í minnihluta í stórleik KR og FH í 1. umferð.

Þjálfararnir eiga líka eftir að ákveða hvað margir af þessum erlendu leikmenn byrja leikinn en félögin voru samt örugglega ekki að semja við þá til að láta þá sitja á bekknum.

Hvort að það bætist við erlendur leikmaður í annaðhvort liðið verður að koma í ljós en nú eru aðeins nítján dagar í leik KR og FH á KR-vellinum.

Erlendir leikmenn hjá FH og KR

Erlendir leikmenn í FH

Jeremy Serwy frá Belgíu

Kassim Doumbia frá Malí

Sam Hewson frá Englandi

Samuel Lee Tillen frá Englandi

Steven Lennon frá Englandi

Jonathan Hendrickx frá Belgíu

Amath André Diedhiou frá Senegal

Erlendir leikmenn í KR

Gary Martin frá Englandi

Rasmus Christiansen frá Danmörku

Sören Frederiksen frá Danmörku

Jacob Schoop frá Danmörku

Gonzalo Balbi frá Úrúgvæ

Farid Zato frá Tógó