„Smiley“ sjóðandi heitt: Íslenskar stelpur gata húðflipann milli efri varar og tannholds

„Mig eiginlega bara að langaði að gera eitthvað klikkað,“ segir Marólína Fanney Friðfinnsdóttir sem hefur verið með „smiley“, eða bros bling, síðan í lok síðasta árs.

„Mikið af vinkonum mínum er með þetta og margar í viðbót sem ég veit að langar,“ segir hún og bætir við að hún telji þetta vaxandi trend meðal stelpna. „Ég hef ekki séð neinn strák með svona,“ skýtur hún að.

Marólína segir einn helsta kost þess að fá sér „smiley“ vera hve auðvelt er að stjórna sýnileika skartsins. „Ég nota stálpinna, sem er byrjunarpinninn, en mun svo skipta yfir í plastpinna síðar,“ svarar hún aðspurð um ótta við áhrif á tannheilsuna.

Marólína segist ekki finna fyrir lokknum þannig séð, hvorki þegar hún borðar eða burstar tennnur.

„Mér finnst þetta bara töff, og langaði í einhverja breytingu. Það er auðvelt að fela þetta ef maður kærir sig um það, “ segir hún en undirtrikar að ætli stelpur sér að fá sér smiley skulu þær fara á stofu. „alls ekki vera að baksa við þe þetta sjálfar, það gæti stútað á ykkur vörinni.“

Vont að bursta

„Mér fannst ekkert vont að fá mér gatið, myndi segja svona tíu sinnum minna vont en að bíta fast í tunguna,“ segir Elín Ásta Finnsdóttir.

Hún hefur þó þurft að taka sinn pinna úr. „Ég var alltaf svo aum þegar ég tók pinnann úr, og vont að bursta tennurnar og svoleiðis,“ útskýrir Elín, sem þykir þó „smiley“ verulega smart og því svekkjandi að geta ekki nýtt gatið. 

Elín tekur undir með Marólínu og segist geta ímyndað sér að smiley sé vaxandi trend vegna þess hve auðvelt er að stjórna hversu áberandi það er. 

„Mér finnst satt að segja sjálfri töluverðir fordómar fyrir svona götunum, fullorðið fólk og foreldrar eru oft með athugasemndir,“ segir hún og bætir við að þó sé greinilegt að fólk sé að verða opnara fyrir svona götunum.

Sérfræðingur segir:

„Við mælum alls ekki með þessu. Lokkur sem nuddast við tennurnar hefur eyðileggjandi áhrif á glerunginn til lengri tíma litið,“ segir Hallfríður Gunnsteinsdóttir tannlæknir. Hún segir stálpinnana hættulega glerungnum, og það sé mýta að tala um að plastpinnarnir séu hættulausir, þó þeir séu skárri.

Hallfríður segist ekki hafa fengið mörg tilfelli inn á borð til sín þar sem „smiley“ sé farið að hafa slæm áhrif, enda um nokkuð nýtt trend að ræða. Hinsvegar hafi hún mikla reynslu af pinnum í tungum sem hafi haft afar slæmar afleiðingar, svo sem tannbrot og fleira.

„Svona aðskotahlutir hafa alltaf afleiðingar á tennurnar okkar, þó svo þær komi ekki endilega í ljós strax.“