Árni Páll: "Er ekki kominn tími til að borga reikninginn fyrir þátttökuna á lista hinna viljugu þjóða?“

Árni Páll Árnason, formaður Samfylkingarinnar, segir að ríkisstjórn Íslands geti reynt að finna sér skjól frá sameiginlegri ábyrgð með því að spila á þjóðernisnótur og segjast ekki ætla að láta ESB segja sér fyrir verkum. „Fínt. Tökum þá við fleiri flóttamönnum en ESB leggur til að við gerum. Er ekki kominn tími til að borga reikninginn fyrir þátttökuna á lista hinna viljugu þjóða?“

Þetta kom fram í ræðu formannsins á flokksstjórnarfundi Samfylkingarinnar sem fram fer á Hótel Natura í dag.

„Innrásin í Írak – studd heilshugar af ríkisstjórn núverandi stjórnarflokka – markaði upphaf hörmungarsögu átaka og ofbeldis sem fólk er nú að flýja. Nú eru hundruð þúsunda að greiða með lífi sínu fyrir það feigðarflan.“

Árni Páll fór um víðan völl í ræðu sinni þar sem hann fjallaði meðal annars um málefni flóttamanna. Sagði hann brýna nauðsyn á sameiginlegu alþjóðlegu átaki þar sem Ísland yrði að taka þátt. „Það verður að vera evrópskt, vegna þess að landamærin eru sameiginleg.“

Glíman við afleiðingar hrunsins að baki

Árni Páll sagði að eftir erfið ár sé glíman við afleiðingar hrunsins loks að baki. „Við getum litið stolt til hlutverks okkar, en sigurinn var þjóðarinnar allrar. En eins og svo oft áður í íslenskri sögu er framtíðin óviss. Íslendingar hafa einstaka getu til að takast saman á við erfiðleika. Það sem okkur hefur hins vegar alltaf skort er aginn og sjálfstjórnin til að þola góða tíma. Og því miður er engin breyting á því.“

Hann segir verkefnin blasa við - heilbrigðisþjónustan, húsnæðismálin, málefni aldraðra og öryrkja, þjónusta við barnafjölskyldur.

Árni Páll sagði einnig brýna þörf vera á að koma á „alvöru uppbyggilegri landsbyggðastefnu“. Sakaði hann stjórnarflokkana um að reyna að að ala á óvild milli höfuðborgar og landsbyggðanna, en hefur enga framtíðarsýn. Hún leggur ekkert uppbyggilegt til atvinnuþróunar eða nýsköpunar í  þjónustu,“ sagði Árni Páll í ræðu sinni.

Sjá má ræðu Árna Páls í heild sinni á vef Samfylkingarinnar.