Stjarnan með stórsigur fyrir austan

Sex leikir fóru fram í A-deild Lengjubikarsins í fótbolta í dag.

ÍA er með fullt hús stiga í riðli 3 og HK hefur sömuleiðis farið vel af stað í riðli 1.

Íslandsmeistarar Stjörnunnar rúlluðu yfir Fjarðabyggð í Fjarðabyggðarhöllinni, 1-6. Þetta var fyrsti sigur Stjörnumanna í Lengjubikarnum.

Arnar Már Björgvinsson skoraði tvö mörk fyrir Garðbæinga og þeir Ólafur Karl Finsen, Pablo Punyed og Atli Freyr Ottesen Pálsson sitt markið hver. Þá skoraði Fjarðabyggð eitt sjálfsmark.

Brynjar Jónasson skoraði mark Austfirðinga úr vítaspyrnu.

FH vann 1-0 sigur á BÍ/Bolungarvík í Akraneshöllinni. Atli Guðnason skoraði eina mark leiksins 20. á mínútu.

Fimleikafélagið er með níu stig í 3. sæti riðils 1 en Djúpmenn eru enn stigalausir og verma botnsæti riðilsins.

Í riðli 2 náði 1. deildarlið Gróttu í stig gegn Víkingi R. Leiknum lyktaði með 3-3 jafntefli en Seltirningar náðu forystunni í tvígang.

Agnar Guðjónsson, Viktor Smári Segatta og Sigurður Steinar Jónsson skoruðu fyrir Gróttu sem er með tvö stig eftir þrjá leiki.

Rolf Toft, Viktor Bjarki Arnarsson og Pape Mamadou Faye skoruðu mörk Víkings sem hefur fengið á sig 10 mörk í fyrstu fjórum leikjum sínum í Lengjubikarnum.

Víkingar sitja í 2. sæti riðils 2 með sjö stig, fimm stigum á eftir Leikni R. sem er með fullt hús stiga eftir fjóra leiki.

Leiknismenn lentu 0-2 undir eftir níu mínútna leik gegn KA í dag en náðu samt að knýja fram sigur.

Kristján Páll Jónsson og Kolbeinn Kárason skoruðu fyrir Leiknis auk þess sem leikmaður KA skoraði sjálfsmark.

Davíð Rúnar Bjarnason og Ýmir Már Geirsson skoruðu mörk Norðanmanna sem eru með þrjú stig eftir þrjá leiki.