Bieber staðfestir komu sína í Kórinn

Margir íslenskir aðdáendur poppgoðsins Justins Bieber trúðu vart sínum eigin augum þegar fréttir af komu hans hingað til lands bárust fyrir helgi.

Sena tilkynnti þá að að Evrópuhluti Purpose-tónleikaferðalagsins Bieber hæfist þann 9. september í Kórnum í Kópavogi.

Sjá einnig: Justin Bieber með tónleika á Íslandi

Yfirlýsingin náði þó ekki að þagga niður hæstu efasemdaraddirnar sem ómuðu um netheima og höfðu margir raunverulegar áhyggjur af því að enginn fótur væri fyrir þessum fregnum.

Bentu margir á að opinber aðdáendasíða tónlistarmannsins tiltæki alla tónleika hans næstu misserin en hvorki tangur né tetur fannst af yfirlýstum tónleikum hans í Kórnum.

Þá gátu notendur Wikipedia ekki uppfært síðu Biebers um tónleikana því öllum slíkum færslum var kippt út jafnóðum. Það var ekki til þess fallið að slá á grunsemdirnar.

En nú hefur popparinn tekið af allan vafa.

Sjá einnig: Justin Bieber: Svona eru verðin og verðsvæðin

Hann er raunverulega að koma til landsins og hefur tónleikum hans í Kórnum verið bætt við á opinbera dagskrá Purpose-tónleikaferðalagsins.

Þeir sem eru enn efins geta séð skjáskot af heimasíðu goðsins hér að neðan. Telji þeir það falsað geta þeir sannreynt það með því að smella hér.