Gerir útgáfusamning við Sony

Tónlistarmaðurinn Axel Flóvent skrifaði á dögunum undir samning við Sony en fyrirtækið mun sjá um að gefa EP-plötu Axels, Forest Fires, út í Evrópu. „Tilfinningin er rosalega góð, þetta er rosa stórt og gott skref, en best er að vita hversu góður samningur þetta er og byrjar á mjög traustum grunni,“ segir Axel alsæll með samninginn.

Sindri Ástmarsson, umboðsmaður Axels, tekur í sama streng: „Þetta er auðvitað frábært. Við ákváðum samt að bíða með frekari skuldbindingar að svo stöddu. Þetta er bara samningur upp á útgáfu plötunnar í nokkrum löndum í Evrópu.“

Sony bauð Axel samning í upphafi sem hann hafnaði en eftir nokkrar viðræður náðust loks samningar. „Við gáfum EP-plötuna út sjálfir hér heima og hjá litlu útgáfufyrirtæki í Bretlandi. Þessi samningur er stórt skref. Það er fáránleg staða að geta hafnað samningi við Sony og fengið betri samning með jafn lítilli skuldbindingu. Þetta er furðu lítil binding og munum við taka nokkurra mánaða prufu með Sony en ef það gengur ekki eins og við viljum verður farið eitthvert annað með næstu plötu Axels,“ segir Sindri. Forest Fires kom út hér á landi í júni og í Bretlandi í maí og kemur nú út í fleiri löndum í Evrópu.

Fyrsta breiðskífa Axels er nánast tilbúin en kemur þó ekki út strax þar sem mikill hiti er yfir EP-plötunni. Næsta ár lítur vel út fyrir Húsvíkinginn unga samkvæmt Sindra. „Árið 2016 lítur mjög vel út og eru ýmsar viðræður í gangi,“ segir Sindri sem gat ekki sagt meira að svo stöddu.

Axel hefur í nógu að snúast um þessar mundir og átti hann til að mynda lag í síðasta þætti af Vampire Diaries. „Lagið heitir Beach og var spilað í þættinum en talið er að um fimm milljónir manns hafi séð þáttinn,“ segir Sindri. Tónlist Axels mun hljóma fleiri þáttum því fyrir skömmu seldi hann lag bæði í stóra þýska auglýsingu og vinsælan sjónvarpsþátt vestan hafs.

Hann heldur af stað í sína fyrstu tónleikaferð um Bandaríkin í lok febrúar og verður úti í tæpan mánuð. „Túrinn endar á South by Southwest tónlistarhátíðinni í Austin í Texas í mars. Hann kemur líka fram á The Great Escape tónlistarhátíðinni á Bretlandi í maí en næst er það Eurosonic-hátíðin í janúar og smá túr í kringum það í Póllandi og Hollandi,“ útskýrir Sindri.

Árið hefur verið annasamt hjá Axel og fór hann meðal annars í tónleikaferð um Þýskaland og Bretland.

Axel kom fram á Jólagestum Björgvins um liðna helgi. „Það má segja að hann hafi stigið út fyrir þæginda­rammann sinn um helgina, hann syngur ekki jólalög fyrir fullri Laugardalshöll á hverjum degi,“ bætir Sindri við léttur í lund.

Spurður út í jólin segist Axel ekkert vera neitt sérstaklega mikið jólabarn og að hann verði að einhverju leyti lokaður inni í æfingahúsnæði um jólin. „Jólin verða smá spilerí og eitthvað af æfingum með hljómsveitinni fyrir Eurosonic sem er í janúar. Svo mun ég líka tjilla með fjölskyldu og vinum,“ segir Axel.