Dæmdu síðast hjá Manchester United og Arsenal en nú hjá Chelsea

Íslenskir dómarar halda áfram að dæma hjá unglingaliðum stóru klúbbanna en nú hefur Gunnar Jarl Jónsson fengið flott verkefni í vikunni.

Gunnar Jarl Jónsson mun dæma leik Chelsea og Porto í Unglingadeild UEFA en leikurinn fer fram miðvikudaginn 9. desember. Knattspyrnusamband Íslands sagði frá þessu í dag.

Gunnar Jarl er aðaldómari leiksins en aðstoðardómarar eru Birkir Sigurðsson og Frosti Valur Gunnarsson. Fjórði dómari er Kevin Johnson frá Englandi.

Leikurinn verður spilaður á hinu glæsilega Cobham-æfingasvæði Chelsea.

Chelsea er búið að vinna riðilinn en liðið hefur náð í 13 stig af 15 mögulegum. Porto er í baráttunni við Dynamo Kiev um annað sætið og þar með sæti í umspili um laust sæti í sextán liða úrslitunum.

Vilhjálmur Alvar Þórarinsson dæmdi leik Manchester United og PSV Eindhoven í síðustu umferð.

Albert Guðmundsson og félagar í PSV Eindhoven unnu þá 5-0 stórsigur á útivelli og skoraði Albert eitt marka PSV í leiknum.

Þorvaldur Árnason dæmdi síðan leik Arsenal og Olympiacos í annarri umferð en Arsenal vann þá 3-2 sigur.