Manchester City á toppinn | Sjáðu mörkin

Manchester City er komið á topp ensku úrvalsdeildarinnar, um stundarsakir að minnsta kosti, en þeir unnu 3-1 sigur á Southampton í dag.

Kevin de Bruyne kom City yfir eftir laglega sendingu frá Raheem Stering, en Sterling hirti boltann af Yoshida sem var í tómum vandræðum í hægri bakvarðarstöðunni hjá Southampton fyrri part hálfleiksins.

Fabian Delph tvöfaldaði svo forystuna fyrir hlé þegar hann þrumaði boltanum í Virgil van Djik og þaðan fór boltinn framhjá Maarten Stekelenburg og í netið. 2-0 í hálfleik.

Í síðari hálfleik var allt annað að sjá til Southampton. Shane Long minnkaði muninn á 50. mínútu, en nær komust þeir ekki og Aleksandar Kolarov gerði út um leikinn á 70. mínútu.

City er því með eins stigs forskot á toppi deildarinnar á Leicester og United er í því þriðja, en United og Leicester mætast á eftir. Southampton er í níunda sætinu.