Klippa þurfti bílflak utan af manni eftir veltu af Skeiðavegi

Betur fór en á horfðist þegar bíll með fimm manns innanborðs valt út af Skeiðavegi um miðnætti. Fjórir komust út úr bílnum af sjálfsdáðum, en einn var fastur í flakinu.

Slökkvilið var kallað á vettvang á tækjabíl og var flakið klippt utan af manninum, sem reyndist nánast ómeiddur eins og hinir fjórir.

Skyndileg ísing hafði myndast á veginum án þess að ökumaðurinn áttaði sig á því.

Nokkur önnur umferðaróhöpp urðu hér og þar á landinu í gærkvöldi og í nótt, án þess að nokkur meiddist alvarlega.