Heimir: Reyndi að dreifa athyglinni frá leikmönnunum

Heimir Guðjónsson, þjálfari Íslandsmeistara FH, var í áhugaverðu viðtali hjá Hirti Hjartarsyni í útvarpsþættinum Akraborginni í dag þar sem hann fór yfir tímabilið sem kláraðist um helgina.

„Ég veit það ekki. Ég fann ekki fyrir létti að hafa unnið mótið. Ég fann fyrir meiri gleði og ánægju að hafa landað þessu. Mér fannst við spila vel í seinni umferðinni og vorum komnir með gott forskot þegar þrjár umferðir voru eftir,“ sagði Heimir, aðspurður hvort hann hafi fundið meiri létti eða gleði eftir að FH tryggði sér Íslandsmeistaratitilinn um þarsíðustu helgi.

Talsverð pressa var á FH í sumar en fyrirfram bjuggust flestir við því að liðið myndi vinna Íslandsmeistaratitilinn næsta auðveldlega, enda var leikmannahópurinn styrktur verulega í vetur. En fannst Heimi vera öðruvísi pressa á FH í sumar en áður?

Meiri pressa frá fjölmiðlum en áður

„Pressan sem er á FH er alltaf sú sama. Það er sú pressa sem við setjum á okkur sjálfa að standa okkur vel og vera í keppni um þá titla sem í boði eru,“ sagði Heimir.

„Hins vegar var meiri pressa frá fjölmiðlum en oft áður, þ.e.a.s. að þetta átti að vera þannig að við áttum að labba í gegnum mótið en það er bara ekki þannig. En ég fann í sjálfu sér ekkert fyrir þessari pressu sjálfur,“ sagði Heimir sem viðurkenndi að hafa notað fjölmiðla til að beina athyglinni frá leikmönnum FH.

Fyrir tímabilið sagði hann í viðtali í Akraborginni að 365 miðlar ynnu markvisst af því að taka pressuna af KR og færa hana yfir á FH og Stjörnuna. Um mitt sumar hjólaði Heimir svo í Hjörvar Hafliðason, sérfræðing Pepsi-markanna, í Akraborginni. Að sögn Heimis var þetta með ráðum gert til að létta pressunni af leikmönnum FH.

Þarf að biðja Hjörvar afsökunar

„Já, maður þarf alltaf að hjálpa leikmönnunum. Ég þurfti að reyna að dreifa athyglinni aðeins frá FH á köflum og reyna að koma henni yfir einhverja aðra. En það breytti því ekki að pressan sem var á mér var svipuð og venjulega.

„Þetta var allt partur af prógramminu,“ sagði Heimir og hló. „Ég þarf að biðja Hjörvar einhvern tímann afsökunar á þessu.“

Heimir segir pressuna á FH ekki hafa verið ósanngjarna en sagði þó að FH-ingar hafi oft átt meira hrós skilið en þeir fengu í fjölmiðlum, og þá sérstaklega eftir sigurleiki.

„Nei, eina sem mér fannst var að, eins og Davíð Þór (Viðarsson, fyrirliði FH) hefur komið inn á, þegar FH var að spila og vann leikinn, þá var andstæðingnum oft hampað meira heldur en FH-liðinu. Það er það eina. Mér fannst að leikmenn FH ættu oft meira hrós skilið frá fjölmiðlum.“

Erfiðara en áður

Heimir að það sé erfiðara að vinna Íslandsmeistaratitilinn nú en áður því liðin séu jafnari.

„Blikarnir voru virkilega góðir og gríðarlega sterkir varnarlega. Valsmenn undir stjórn Óla Jóh voru góðir, KR-ingar, Fjölnismenn og Stjörnumenn, þótt þetta hafi verið vonbrigðatímabil hjá þeim. En við vitum að þeir eru með gott lið og þeir eiga eftir að læra af þessu tímabili.

„Það er orðið miklu erfiðara að vinna leikina stórt. Liðin eru vel skipulögð og vel þjálfuð, þannig að þetta er alltaf að verða erfiðara og erfiðara,“ sagði Heimir og bætti því að það hefði tekið tíma að slípa lið FH saman enda urðu nokkrar breytingar á liðinu frá því í fyrra.

„Ef við tölum bara um fyrri umferðina, þá gerðum við okkur grein fyrir því að það tæki tíma að slípa þetta saman eftir talsverðar breytingar í vetur. Þess vegna lögðum við upp með að vera vel skipulagðir og gefa fá færi á okkur og mér fannst það ganga vel í flestum leikjum. Og í byrjun bjóða vellirnir ekki endilega upp á neinn sambabolta og þá þurfa aðrir hlutir að vera í lagi sem og þeir voru hjá okkur,“ sagði Heimir um spilamennsku FH í fyrri umferðinni sem á köflum gagnrýnd.

Emil breyttist í toppleikmann

Heimir ræddi einnig um Emil Pálsson sem kom eins og stormsveipur inn í lið FH um mitt sumar eftir að hafa verið lánaður til Fjölnis í byrjun tímabils.

„Emil fór úr því að vera slarkfær leikmaður í efstu deild í að vera toppleikmaður,“ sagði Heimir um breytinguna á Emil í sumar.

„Ég las viðtal við hann þar sem hann sagðist hafa hugsað með sér hvort þetta væri búið hjá FH. Ég var með hugmyndir um hvernig við gætum þróað hann sem leikmann. Ég man þegar ég tilkynnti honum þetta, þá spurði hann: „Er ég þá út úr myndinni hjá FH?“ Ég útskýrði fyrir honum að svo væri það ekki,“ sagði Heimir um þá ákvörðun að lána Emil til Fjölnis.

„Ég vann þetta með Óla Palla (Ólafi Páli Snorrasyni, spilandi aðstoðarþjálfara Fjölnis og fyrrverandi leikmanni FH) og við fórum yfir hvernig þetta ætti að vera gert og við vorum báðir sammála um að þetta væri rétt ákvörðun.

„Hann festi sig í sessi hjá Fjölni og það gekk gríðarlega vel hjá honum þar. Þegar hann kom til baka var hann búinn að ná þessum stöðugleika sem hann vantaði áður. Hann var notaður í nokkrum stöðum til að byrja með en síðan fór hann inn á miðjuna og leit ekki til baka eftir það,“ bætti Heimir við en Emil var valinn leikmaður ársins af leikmönnum Pepsi-deildarinnar að tímabilinu loknu.

Hlusta má á viðtalið í heild sinni í spilaranum hér að ofan en þar ræðir Heimir m.a. um varnarmanninn umdeilda Kassim Doumbia, fjölmiðlabannið sem FH-ingar fóru í og framhaldið hjá sér og FH-liðinu.