Hlýtt og gott fyrir gistiskýlið og Konukot

Facebook hópurinn "Hlýtt og gott fyrir Lindargötu og Konukot“ var stofnaður í gærkvöldi og hafa nú þegar yfir 300 manns skráð sig. Vigdís Garðarsdóttir stofnaði hópinn en segir hún hugmyndina hafa kviknað eftir að systir hennar vakti máls á stöðu þeirra sem nýta sér aðstöðuna.

Markmiðið með hópnum er að stofna vettvang þar sem einstaklingar geta gefið heimagerðar húfur og vettlinga, trefla og hvað eina annað sem nýst gæti þeim sem þiggja aðstoð gistiskýlanna í vetrarkuldanum.

Ásgerður Kjartansdóttir er einn meðlima hópsins. Aðspurð hvers vegna hún hafi ákveðið að taka þátt í þessu verkefni segir hún: "Þegar ég sá þetta ákall fyrir Lindargötu og Konukot þá rann mér blóðið til skyldunnar, en ég er búin að vera að hekla í talsverðan tíma úr afgangsgarni og mér fannst þetta bara tilvalið verkefni.“