Davíð Þór: Reynum að hefna að einhverju leyti fyrir tapið í fyrra

Davíð Þór Viðarsson, fyrirliði FH, segir að fólk megi búast við alvöru leik tveggja góðra liða í Kaplakrika á morgun þegar FH og Stjarnan mætast í stórleik sextándu umferð Pepsi-deildar karla.

Liðin eru að mætast í fyrsta skipti í Kaplakrika eftir úrslitaleikinn í fyrra og segir Davíð að FH-ingar séu nokkurn veginn búnir að jafna sig.

„Við erum að ég held búnir að jafna okkur nokkurn veginn eftir það og erum í harðri baráttu á toppnum," sagði Davíð Þór í samtali við Svövu Kristínu í kvöldfréttum Stöðvar 2 aðspurður út í leikinn dramatíska í fyrra.

„Við þurfum virkilega á þessum þremur stigum að halda á morgun og auðvitað kryddar það aðeins að þetta er Stjarnan sem er að koma hingað í fyrsta skipti eftir þennan leik," en hvernig er staðan á lykilmönnum?

„Hún er svipuð. Við erum að fá menn til baka. Hewson er kannski sá sem er lengst frá því að spila eftir fótbrotið sitt, en það á eftir að koma í ljós. Hann spilar líklega ekkert fyrr en í september, en hinir eru annað hvort tilbúnir eða alveg við það að verða tilbúnir."

Stjarnan situr í sjötta sæti Pepsi-deildarinnar með 20 stig, en liðið varð eins og kunnugt er Íslandsmeistari í fyrra.

„Þeir hafa kannski valdið vissum vonbrigðum, en þetta er spurning um það að þeir hafa verið frekar óheppnir með meiðsli. Atli Jóhannsson er búinn að vera frá allt tímabilið og hann var virkilega mikilvægur fyrir þá í fyrra."

„Michael Præst var meiddur í upphafi móts, Garðar er búinn að vera meiddur og þetta snýst líka aðeins um að vera heppnir með meiðsli og annað slíkt. Þeir eru með hörkugott lið og við gerðum jafntefli við þá í fyrri umferðinni," en við hverju mega áhorfendur búast?

„Þetta verður alvöru leikur tveggja góðra liða og við þurfum að gjöra svo vel að mæta tilbúnir og reyna kannski að hefna að einhverju leyti fyrir tapið í fyrra," sagði Davíð Þór að lokum.

Innslagið í heild sinni má sjá hér að ofan, en leikurinn verður í benini útsendingu Stöðvar 2 Sport og hefst leikurinn klukkan 18:30.