Game of Thrones hefur áhrif á nöfn breskra barna

Sjónvarpsþættir og frægt fólk hefur áhrif á nöfn gefin börnum í Bretlandi. Þetta má lesa úr gögnum frá bresku hagstofunni.

Alls var 53 stúlkum gefið nafnið Khaleesi á síðasta ári og níu hlutu nafnið Daenerys. 244 fengu nafnið Arya en Sansa systir hennar þykir öllu óvinsælari. Aðeins sex stúlkur voru skírðar, eða nefndar, Sansa. Nafnið Brienne kemur nýtt inn á mannanafnaskrá en fjórar stúlkur fengu það nafnið.

Augljóst er að nöfnin Theon, Tyrion, Bran og Sandor hafa orðið vinsælari eftir að þættirnir litu dagsins ljós. Að meðaltali voru fjórir drengir nefndir Theon á árunum 2001-11 en undanfarin ár hafa um sextán drengir hlotið nafnið árlega. Mikla aukningu má sjá á vinsældum nafnsins Tyrion en sautján drengir fengu nafnið á síðasta ári en aðeins sex árið á undan. Nafnið Bran fellur í vinsældum enda sást Bran Stark ekkert í síðustu þáttaröð.

Nafnið Anna hefur hríðfallið frá aldamótum en árið 2000 fengu rúmlega 1.600 stúlkur nafnið. Í fyrra voru þær aðeins áttahundruð og stendur nafnið í stað milli ára. Nafnið Elsa tekur hins vegar gífurlegan kipp enda vinsældir Disney-myndarinnar Frozen miklar. 537 stúlkum var gefið nafnið samanborið við um þrjúhundruð árið áður.

Zayn Malik hefur haft mikil áhrif á vinsældir nafnsins Zayn en 231 drengur hlaut nafnið í fyrra en það er áttföldun frá árinu 2010. Zayn er hættur í One Direction en nafn hans er það næstóvinsælasta af þeim sem skipa sveitina. Aðeins Niall er óvinsælara. Nöfnin Louis og Liam daðra bæði við þúsundkallinn en Harry ber höfuð og herðar yfir aðra meðlimi. 5.379 breskir drengir hlutu nafnið Harry í fyrra en óvíst er hvort það megi allt rekja til Harry Styles.

Níu drengir hlutu nafnið Channing en enginn Breti hafði borið það fram til ársins 2009 en þá birtist Channing Tatum í myndunum Step Up og 21 Jump Street. Vinsældir kvenmannsnafnsins Mila hafa einnig aukis frá árinu 2010 er hún lék í Black Swan. 533 stelpur fengu nafnið í fyrra.