Bilic búinn að kaupa fyrsta leikmanninn til West Ham

Enska úrvalsdeildarliðið West Ham United hefur fest kaup á spænska miðjumanninum Pedro Obiang frá Sampdoria. Kaupverðið hefur ekki verið gefið upp.

Obiang, sem er 23 ára, skrifaði undir fjögurra ára samning við West Ham sem endaði í 12. sæti ensku úrvalsdeildarinnar á nýliðnu tímabili.

Obiang, sem leikur með U-21 árs landsliði Spánar, er fyrsti leikmaðurinn sem Slaven Bilic, nýr knattspyrnustjóri West Ham, fær til liðsins.

Obiang skoraði þrjú mörk í 34 leikjum með Sampdoria í ítölsku úrvalsdeildinni í vetur.