Íslenski boltinn

Uppbótartíminn: Þristaregn á Hlíðarenda - Myndbönd

Haukur Páll Sigurðsson tekur út gremju sína á Valgeiri Valgeirssyni, dómara.
Haukur Páll Sigurðsson tekur út gremju sína á Valgeiri Valgeirssyni, dómara. vísir/valli
Fyrsta umferð Pepsi-deildar karla í knattspyrnu kláraðist í gær. Hverjir áttu góðan dag og hverjir áttu erfiðan dag? Hvað segir tölfræðin og hver var umræðan á Twitter? Vísir gerir hér upp umferðina á léttum nótum.

Nýliðar Leiknis eru á toppi deildarinnar eftir glæsilega frumraun í deildinni. Þeir unnu Valsmenn, 3-0. Stórveldaslagur KR og FH var ekki mikið fyrir augað en þar höfðu FH-ingar sigur, 3-1. Eina jafnteflið var í Árbænum þar sem Fylkir og Breiðablik áttust við.

Umfjallanir og viðtöl úr öllum sex leikjum umferðarinnar:

Fylkir - Breiðablik 1-1

KR - FH 1-3

Keflavík - Víkingur 1-3

Valur - Leiknir 0-3

Fjölnir - ÍBV 1-0

ÍA - Stjarnan 0-1

Yfir 2.200 manns mættu í Lautina í gær.vísir/stefán
Góð umferð fyrir ...

... Ólaf Karl Finsen

Framherjinn magnaði lokaði Íslandsmótinu í fyrra með marki sem tryggði Stjörnunni Íslandsmeistaratitilinn í fyrsta skipti í sögu félagsins. Hann setti svo nýtt Íslandsmót með stórkostlegu aukaspyrnumarki í 1-0 sigri sinna manna. Eftir leik bauð hann svo upp á mest kósí viðtal í sögunnar þegar hann hélt föðurlega utan um Gaupa í beinni útsendingu.

... Leiknismenn

Nýliðarnir tóku sig til og pökkuðu Valsmönnum saman, 3-0, í fyrsta leik liðsins í efstu deild. Sigurinn er einn sá flottasti hjá nýliðum undanfarin 30 ár. Glæsileg frumraun Leiknismanna sem voru margfalt betri inn á vellinum og í stúkunni.

... Gjaldkera Fylkis

Fylkismenn íhuga nú eflaust að fresta sem flestum leikjum til að eiga heilu leikdagana fyrir sig sjálfa. Ekkert var í boði á fimmtudagskvöldið annað en leikur Fylkis og Breiðabliks sem gerði það að verkum að ríflega 2.200 manns mættu í Árbæinn. Bankabókin í Lautinni gildnaði aðeins.

Valsmenn lágu í valnum gegn Leikni.vísir/valli
Erfið umferð fyrir ...

... Valsmenn

Það voru allir léttir í lund fyrir leik en eftir þrettán mínútur var liðið lent 2-0 undir og það endaði með 3-0 tapi gegn nýliðum Leiknis. Leikmenn Vals söfnuðu svo sex þristum í einkunnagjöf Vísis sem gæti verið met og þá tók hamborgarabíll Priksins sem var á staðnum ekki debetkort. Hver gengur með pening á sér árið 2015?

... Richard Arends

Hollenski markvörðurinn fékk á sig mark úr aukaspyrnu á móti Víkingi. Markið var af 40 metra færi. Sævar Júlíusson, markvarðaþjálfari Keflavíkur, hellti sér yfir Hollendinginn beint eftir leik og náðist það á upptöku.

... Áskel Þór Gíslason

Norðanmaðurinn var aðstoðardómari eitt í upphafsleik mótsins á Skaganum og tókst að dæma innkast eftir rangstöðu. Sá fær eflaust að heyra brandara innan dómaraklíkunnar um þessi barnalegu mistök eitthvað fram á næsta áratug.

Pálmi Rafn Pálmason með tilþrif í leik KR og FH.vísir/stefán
Tölfræðin og sagan:

*Fyrsti útisigur Stjörnunnar í 1. umferð efstu deildar í tæp 25 ár eða síðan í 2-0 sigri á Þór á malarvelli Þórs á Akureyri 19. maí 1990.

*Ólafur Karl Finsen skoraði bæði síðasta mark 2014-tímabilsins og fyrsta mark 2015-tímabilsins en því náði líka Steinar Jóhannsson 1971 og 1972.

*Gunnlaugur Jónsson, þjálfari ÍA, hefur byrjað bæði tímabil sín sem þjálfari í efstu deild á móti ríkjandi Íslandsmeisturum.

*Fjölnir er með fullt hús (12 stig af 12 mögulegum) í fyrsta heimaleik liðsins á úrvalsdeildartímabili.

*Eyjamenn hafa spilað 11 útileiki í röð í 1. umferð í efstu deild án þess að fagna sigri eða alla leiki síðan þeir unnu KA á Akureyri í 1. umferðinni 1991.

*Þetta er í fyrsta sinn sem Víkingar fá þrjú stig fyrir sigur í Keflavík því þegar þeir unnu síðast á Keflavíkurvellinum, 13. ágúst 1983, voru aðeins gefin tvö stig fyrir sigur.

*Ívar Örn Jónsson varð fyrsti Víkingurinn til að skora beint úr aukaspyrnu í efstu deild síðan að Gunnar Kristjánsson skoraði beint úr aukaspyrnu á móti Breiðabliki 26. ágúst 2007.

*Hörður Sveinsson skoraði í sínum þriðja deildarleik í röð á móti Víkingi og öll þrjú mörkin hafa komið frá 35. til 50. mínútu.

*Valsmenn hafa tvisvar mætt félagi í sínum allra fyrsta leik í efstu deild frá árinu 1955 og tapað í bæði skiptin, 1968 á móti ÍBV í Eyjum (3-1) og svo 3-0 á móti Leikni.

*Kolbeinn Kárason hefur skorað 11 af 17 mörkum sínum í efstu deild á Vodafonevellinum.

*FH er eina félagið frá 2008 sem hefur unnið sinn leik í fyrstu umferð eftir að hafa verið spáð titlinum af fyrirliðum, þjálfurum og forráðamönnum (2013 og 2015).

*KR-ingar hafa aðeins fimm sinnum tapað fyrsta leik sínum á KR-vellinum á 32 tímabilum þar og FH-ingar hafa unnið fjóra þeirra (1995, 2004, 2006 og 2015).

*Fyrstu mörk Atla Guðnasonar í fyrstu umferð í sjö ár eða síðan hann skoraði í 4-0 sigri á HK í 1. umferð 2008.

Gylfi Már Sigurðsson fær að heyra það frá Bjarna Guðjónssyni.vísir/stefán
Skemmtilegir punktar úr boltavaktinni:

Henry Birgir Gunnarsson á Fylkisvelli:

„Jóhannes Karl Guðjónsson fékk gult spjald - sá ekki almennilega fyrir hvað enda sólin í andlitinu á manni og rúðan í skítugri kantinum. Hún var samt þrifin fyrir leik en versnaði við það. Stundum betra að þrífa þvegilinn.“

Anton Ingi Leifsson á Fjölnisvelli:

„Það er 12:00 þema hérna í lögunum fyrir leik. Sumartíminn var áðan og nú er það Sama stelpa sem kemur úr hátalarakerfinu. Ég er að fýla þetta, en það eru sjötugir menn fyrir hliðina á mér. Þeir eru á báðum áttum einhvernveginn.“

Hæstu og lægstu einkunnir umferðarinnar:

Róbert Örn Óskarsson, FH - 8

Halldór Kristinn Halldórsson, Leikni - 8

Óttar Bjarni Guðmundsson, Leikni - 8

Hilmar Árni Halldórsson, Leikni - 8

Ólafur Páll Snorrason, Fjölni - 8

Árni Snær Ólafsson, ÍA - 8

Pablo Punyed, Stjörnunni - 8

Ingimundur Níels Óskarsson, Fylki - 3

Hákon Ingi Jónsson, Fylki - 3

Andri Rafn Yeoman, Breiðabliki - 3

Arnþór Ari Atlason, Breiðabliki - 3

Ellert Hreinsson, Breiðabliki - 3

Ingvar Þór Kale, Val - 3

Andri Fannar Stefánsson, Val - 3

Þórður Steinar Hreiðarsson, Val - 3

Patrick Pedersen, Val - 3

Sigurður Egill Lárusson, Val - 3

Andri Adolphsson, Val - 3

Gunnar Þorsteinsson, ÍBV - 3

Umræðan #pepsi365

Mark umferðarinnar: Atvik umferðarinnar: Markasyrpa 1. umferðar:

Tengdar fréttir

Pepsi-mörkin | 1. þáttur

Sjáðu styttri útgáfu af Pepsi-mörkunum þar sem farið er yfir 1. umferð Pepsi-deildar karla í fótbolta.




Fleiri fréttir

Sjá meira


×