Markvarðaþjálfari Keflavíkur lét nýja markvörðinn heyra það

Richards Arends, Hollendingurinn í marki Keflavíkur, átti ekkert sérstaka frumraun í Pepsi-deild karla í fótbolta á sunnudagskvöldið.

Hann fékk á sig þrjú mörk, en það síðasta var kosið atvik fyrstu umferðar í Pepsi-mörkunum í gærkvöldi.

Aukaspyrnu-Ívar Örn Jónsson skoraði þá framhjá Hollendingnum af 40 metra færi, en Arends hefði klárlega átt að gera betur.

Eftir leik var ekkert elsku mamma í boði frá markvarðaþjálfara Keflavíkur, Sævari Júlíussyni. Hann lét Arends heyra það, en rifrildi þeirra náðist á mynd.

Máni Pétursson, aðstoðarþjálfari Keflavíkur, þurfti að skerast í leikinn og skilja þá tvo að eins og sjá má í myndbandinu hér að ofan.