Ekki búið að kaupa skattagögnin

Bryndís Kristjánsdóttir skattrannsóknastjóri segir að ekki sé búið að festa kaup á gögnum sem sýna undanskot Íslendinga í gegnum fyrirtæki erlendis, eða skattaskjólsgögnin svokölluðu. Uppsett verð fyrir gögnin eru 150 milljónir og hefur hún áður sagt að gengið verði til samninga við seljanda gagnanna.

„Málið er í vinnslu og ég svona ætla að það sé að styttast í þetta,“ segir Bryndís í samtali við Vísi.

Ekki er um að ræða hefðbundnar upplýsingar um bankareikninga í fjármálastofnunum, þ.e að einungis er um að ræða nöfn einstaklinga en ekki upphæðir. Bryndís vildi lítið tjá sig um gögnin að öðru leyti en því að þau gefi ákveðnar vísbendingar um undanskot og tengi einstaklinga við félög í skattaskjólum.

Seljandinn er reiðubúinn til að láta gögnin af hendi fyrir 150 milljónir króna, eða 2.500 evrur fyrir hvert mál, en þau eru 416 talsins.