Kvaddi skóna með sigurmarki gegn margföldum meisturum

Dagný Brynjarsdóttir skoraði sitt fyrsta mark fyrir Bayern München þegar hún tryggði liðinu 1-0 sigur á Turbine Potsdam í þýsku úrvalsdeildinni í gær.

„Þetta var reyndar annað markið mitt,“ leiðrétti Dagný blaðamann Vísis þegar hann heyrði í henni áðan.

„Fyrsta markið mitt var ólöglegt. Ég skoraði í síðasta leik (gegn Duisburg) sem fór 0-0 en var dæmd rangstæð. Þegar ég kíkti svo á markið á myndbandi sá ég að ég var ekkert rangstæð,“ sagði landsliðskonan í léttum dúr.

Dagný skoraði markið í gær þegar 15 mínútur voru eftir af leiknum. Markið reyndist afar mikilvægt en með sigrinum komst Bayern aftur upp í 2. sæti deildarinnar, einu stigi á eftir toppliði Wolfsburg.

„Þetta var mjög fín tilfinnig og gaman að skora mikilvægt mark. Ég fékk tvö fín færi fyrr í leiknum og var alveg viss um að ég fengi eitt færi í viðbót sem ég yrði að klára,“ sagði Dagný sem hefur spilað fimm leiki fyrir Bayern, alla frá upphafi til enda.

Sjá hér hápunkta úr leiknum í gær. Mark Dagnýjar kemur eftir rúmar fjórar mínútur.

„Við eigum góða möguleika á að halda 2. sæti ef við klárum okkar leiki og svo vonumst við bara til þess að Wolfsburg misstígi sig,“ sagði Dagný en Bayern á fjóra leiki eftir í deildinni. Dagný og félagar sækja SC Sand heim í næsta leik sínum á sunnudaginn eftir viku. Með liðinu leikur bandaríski markvörðurinn Alexa Gaul en þær Dagný voru samherjar hjá Selfossi síðasta sumar.

Dagný segir að hún sé alltaf að komast betur og betur inn í leik Bayern sem hefur ekki enn tapað leik í deildinni.

„Ég er alltaf að komast betur inn í þetta og ná að spila minn leik. Í fyrstu leikjunum var ég að venjast liðinu og leikmönnunum, læra inn á þeirra styrkleika og þeir inn á mína.

„Það er mikil harka hérna og maður fær að kynnast þýska stálinu, bæði á æfingum og í leikjum. Maður verður að vera sterkur andlega. Þetta getur verið erfitt en maður verður að harka þetta af sér,“ sagði Dagný sem hefur aðallega spilað sem fremsti miðjumaður með Bayern, auk þess sem hljóp í skarðið í stöðu aftari miðjumanns á dögunum, í fjarveru fyrirliða liðsins.

Dagný er með samning við bandaríska íþróttavöruframleiðandann Nike en hefur spilað í skóm frá Adidas í síðustu leikjum.

„Ég er með samning við Nike en hef verið að bíða eftir Nike-skóm. Það þurfti að panta þá frá Bandaríkjunum því Nike-umboðið hér heima átti ekki skrúfur í minni stærð,“ sagði landsliðskonan sem þarf að spila í takkaskóm með skrúfutökkum í Þýskalandi.

„Það er vetur hérna og vellirnir eru svo lausir í sér. Ég kom ekki með skrúfur með mér, þar sem ég hef verið að spila á Íslandi og í Flórída og þú þarft ekki skrúfur þar.“

Það styttist þó í að hún fái nýju Nike-skóna í hendurnar.

„Mamma er að koma frá flugvellinum en hún er með Nike-skóna með sér,“ sagði Dagný að lokum.