Glæsimörk Pedersen í Lengjubikarnum | Sjáðu mörkin

Patrick Pedersen skoraði tvö mörk þegar Valur lagði ÍA að velli, 3-1, í Lengjubikarnum í gær.

Þetta var fyrsta tap Skagamanna í Lengjubikarnum en þeir eru þó enn á toppi riðils 3 með 12 stig eftir fimm leiki. Valsmenn koma þar á eftir, með átta stig eftir fjóra leiki.

Pedersen kom Val í 2-0 með tveimur mörkum á þriggja mínútna kafla í fyrri hálfleik.

Mörkin voru af dýrari gerðinni; í því fyrra lyfti Daninn boltanum skemmtilega yfir Árna Snæ Ólafsson, markvörð Skagamanna, og það seinna skoraði Pedersen með góðu skoti fyrir utan vítateig.

Kristinn Freyr Sigurðsson skoraði þriðja mark Valsmanna á lokamínútu fyrri hálfleiks eftir góðan undirbúning Bjarna Ólafs Eiríkssonar.

Albert Hafsteinsson minnkaði muninn í 3-1 á 66. mínútu en nær komust Akurnesingar ekki.

Mörkin úr leiknum má sjá á heimasíðu SportTV.