Upphlut stolið um hábjartan dag úr Ráðhúsi Reykjavíkur

Upphlut sem Heimilisiðnaðarfélagið hafði lánað á sýninguna Afrekskonur í Ráðhúsi Reykjavíkur hvarf þaðan á laugardaginn um miðjan dag. Reykjavíkurborg stendur að sýningunni sem er hluti af hátíðarhöldum vegna 100 ára afmælis kosningaréttar kvenna.

„Það var leitað til okkar um að lána þjóðbúninga til að lífga upp á sýninguna og við gerðum það til að kynna búningana og starfsemi okkar,“ segir Margrét Valdimarsdóttir, formaður Heimilisiðnaðarfélagsins í samtali við Vísi. Félagið lánaði tvo búninga, peysuföt og upphlut, sem settir voru á gínur. Þær voru svo hafðar til sýnis uppi á flygli sem er í sal Ráðhússins.

„Gínan var einfaldlega tekin til hliðar og búningurinn tekinn af henni,“ segir Margrét.

Búningurinn kostar mörghundruð þúsund

Eftirlitsmyndavélar eru í salnum og er málið nú í rannsókn lögreglu. Heimilisiðnaðarfélagið deildi mynd af búningnum á Facebook í von um að hann kæmi í leitirnar enda er tjónið mikið. Skartið í búningnum er gullhúðað silfur.

„Búningurinn er fleiri hundruð þúsund króna virði en það er ekki svo auðvelt að koma þessu í verð. Það er tiltölulega þröngur hópur sem er að kaupa þjóðbúninga og þess vegna ákváðum við að setja myndina á Facebook og koma henni í dreifingu þannig að fólk myndi þekkja búninginn ef einhver skyldi bjóða hann til sölu,“ segir Margrét og bætir við að þjófnaðurinn sé með miklum ólíkindum. Hún segir Heimilisiðnaðarfélagið vona að búningurinn komi í leitirnar.

Hvarflaði ekki að neinum að svona nokkuð gæti gerst

„Þetta er náttúrulega fyrst og fremst afskaplega leiðinlegt og þetta kemur okkur á óvart. Við höfum treyst á heiðarleika fólks hér í Ráðhúsinu, upp að því marki sem það er eðlilegt og skynsamlegt,“ segir Sóley Tómasdóttir, forseti borgarstjórnar, en eins og áður segir eru eftirlitsmyndavélar í Ráðhúsinu auk húsvarða sem starfa þar.

Sóley segir að það hafi ekki hvarflað að neinum að svona nokkuð gæti gerst og hún vonar að búningurinn finnist. Aðspurð hvort að þetta verði til þess að eftirlit í Ráðhúsinu verði tekið til endurskoðunar segir hún:

„Við munum sjálfsagt fara yfir það hvernig við getum tryggt sem best öryggi hér í húsinu. Einhvern veginn hugnast mér það samt ekkert mjög vel að taka upp hertar öryggisreglur. Ég vil geta treyst fólki en ef að það er mat sérfræðinga að það þurfi að herða hér reglur þá munum við auðvitað gera það.“

Facebook-færslu Heimilisiðnaðarfélagsins má sjá hér að neðan en henni hefur verið deilt yfir 500 sinnum.

Þessum búning var stolið af sýningu í Ráðhúsi Reykjavíkur núna um helgina. Vinsamlega hafið augun hjá ykkur ef hann býðst til kaups á næstu dögum og vikum. Og vinsamlega deilið þessum pósti.

Posted by Þjóðbúningastofa 7íhöggi ehf. on Sunday, 6 September 2015