Stefna borginni vegna lokunar Þorrasels

Aldraðir íbúar fjölbýlishússins Þorragötu 5-9 hafa stefnt Reykjavíkurborg vegna einhliða ákvörðunar velferðarráðs borgarinnar að loka dagdvöl fyrir aldraða sem um árabil hefur verið starfrækt í Þorraseli, Þorragötu 3, og flytja þjónustuna að Vesturgötu 7. Húsnæðið við Þorragötu 3 verður nú nýtt í frístundastarfsemi fyrir börn og unglinga. Þetta kemur fram í tilkynningu frá íbúum.

Íbúarnir telja að ákvörðun borgarinnar brjóti í bága við ákvæði samninga og laga. Hún gangi einnig þvert á þær forsendur sem lágu til grundvallar við skipulag lóðarinnar, hönnun húsnæðisins og kaupum íbúanna á fasteignum sínum í fjölbýlishúsinu en innangengt er í þjónustumiðstöðina úr húsinu.

Borgarráð Reykjavíkur veitti á sínum tíma byggingarleyfi á lóðinni fyrir fjölbýlishús og þjónustumiðstöð fyrir aldraða. Samkomulag er í gildi milli húsfélagsins og Reykjavíkurborgar að breytingar á skipulagi hvors lóðarhluta séu háðar samþykki beggja aðila, enda kemur fram í lóðaleigusamningi að lóð 3-9 við Þorragötu sé ein lóð og á henni eru kvaðir sem ber að uppfylla, m.a. um þjónustumiðstöð fyrir aldraða. Breytingar á nýtingu húsnæðisins við Þorragötu 3 er einnig brot á lögum um fjöleignarhús en ekki hefur fengist samþykki íbúa fjölbýlishússins Þorragötu 5-9 fyrir breytingunum.

Íbúar við Þorragötu 5-9 nýta sér þjónustu Þorrasels en dagdeildin er úrræði fyrir einstaklinga sem búa í heimahúsum en þurfa félagslegan stuðning.  Þar er boðið upp á mat, félagsstarf, handavinnu, léttar leikfimiæfingar og aðstoð við böðun.  Einnig er hægt að fá þar sjúkraþjálfun, fót- og hársnyrtingu.