Telur vopnaburð hluta af vinnuvernd

„Íslenska lögreglan er ekki að vopnast. Þetta er bara spurning um aðgengi,“ segir Eyþór Víðisson löggæslufræðingur þegar hann er beðinn um álit á þeirri breytingu að skammbyssur verði í læstum hólfum í sex lögreglubílum.

Eyþór segir lögregluna í langflestum löndum vopnaða og þróunin sé í þá átt. Þetta skref íslensku lögreglunnar sé lítið en þetta sé bara fyrsta skrefið.

„Þróun á lögum og vinnuvernd hefur aukið ábyrgð vinnuveitenda. Vinnuveitendur eiga að gera allt til að tryggja öryggi starfsmanna sinna. Aukið aðgengi að vopnum snýst að miklum hluta til um öryggi lögreglumanna. Að vera lögreglumaður er bara starf, fólk gleymir því.“

Eyþór bendir á að lögreglan sé í erfiðustu aðstæðum sem koma upp. Á meðan almenningur hlaupi burt frá hættu, hlaupi lögreglan að henni.

„Hvernig ætlum við að réttlæta það ef manneskja með átta haglabyssur byrjar að skjóta í Kringlunni að lögreglan geti ekki gert neitt? Hvernig á lögreglustjóri að horfa framan í almenning daginn eftir? Nei, við gátum ekkert gert því við vorum hrædd við virka í athugasemdum. Það svar er ekki í boði.“

Eyþór viðurkennir að vissulega séu vopn dregin oftar upp og fleiri falli þegar lögreglan er vopnuð.

„En við verðum líka að spyrja okkur hversu mörgum skotárásum lögreglan afstýrir með því að vera vopnuð. Eða hversu margir hætta við að fremja glæp því löggan er vopnuð. Þetta eru upplýsingar sem við fáum ekki fram.“

Lögreglan er búin kylfum og piparspreyi. Einnig hefur verið umræða um rafmagnsbyssur. „Maður stoppar ekki brjálaða manneskju með þessum vopnum. Þegar allt kemur til alls er þetta einföld eðlisfræði. Maður mætir byssu með byssu og það er óviðunandi að lögreglan hafi ekki bestu tólin til að takast á við slíkar aðstæður.“

Eyþór segist vita að þetta hljómi ofbeldisfullt og ógnvekjandi en bendir á að byssur hafi verið til í þrjú hundruð ár og það sé veruleiki lögreglumanna.

„Um sextíu þúsund byssur eru skráðar á Íslandi. Ekki skammbyssur, en haglabyssur og rifflar. Næstu ár verða fréttir af fleiri bílum með byssur. Síðan af löggu að halda á byssu og löggu að skjóta sig í fótinn. Og það verða læti og dramatík. En það er eðlilegt að það taki almenning tíma að venjast þessu.“

Vinnuvernd lögreglumanna óviðunandi

Fréttablaðið hefur fjallað ítarlega um starfsaðstæður lögreglunnar. Vinnueftirlit ríkisins hefur á skrá tæplega 400 vinnuslys hjá lögreglumönnum á fjögurra ára tímabili. Vinnueftirlitið hefur frá hruni endurtekið beint því til Stjórnarráðsins að gera átak í vinnuvernd en fálega hefur verið tek