„Ekki loka augunum“

Víðs vegar um borgina má sjá styttur með bundið fyrir augun, en slagorð dagsins í dag er „Ekki loka augunum.“ Er þetta gert til að vekja athygli á hylmingu ríkisstjórna yfir pyndingum og er þetta gert meðal annars á Írlandi, í Þýskalandi og í Sviss.

Þrjátíu ár eru liðin frá því að samningur um bann við pyndingum og annarri ómannúðlegri og vanvirðandi meðferð tók gildi á vettvangi Sameinuðu þjóðanna. Í tilefni þess er alþjóðlegur dagur til stuðnings fórnarlömbum pyndinga í dag og hefur Amnesty International ýtt úr vör herferð gegn pyndingum.

Frá árinu 1984 hafa 155 ríki fullgilt samning Sameinuðu þjóðanna gegn pyndingum og hafa þar af 142 lönd sætt rannsókn Amnesty International. Sú rannsókn leiddi í ljós að í dag, árið 2014, stunda 79 þessara ríkja enn pyndingar. Fjörutíu ríki Sameinuðu þjóðanna hafa ekki samþykkt samninginn. Bannið nær þó til allra ríkja, óháð því hvort þau hafa samþykkt alþjóðasáttmála sem kveða á um bannið eður ei.

„Bannið á við um allar kringumstæður, án nokkurra undantekninga, og ekki er hægt að afnema það þó að um stríðsástand ræðir eða þegar almennt neyðarástand ríkir. Pyndingar eru aldrei réttlætanlegar. Þær eru villimannslegar og siðlausar, og ein stærsta smán mannkyns,“ segir í tilkynningunni frá Amnesty.

Síðustu tvö sumur hefur Ungliðahreyfing Íslandsdeildar Amnesty International haldið pyndingaaðgerð á Austurvelli í tilefni af alþjóðlega deginum. Næsta laugardag, 28. júní, klukkan 15:00-18:00 mun Ungliðahreyfingin halda slíka aðgerð í þriðja skiptið og að þessu sinni verður athyglinni beint að hylmingu ríkisstjórna yfir pyndingum með táknrænni aðgerð og undirskriftasöfnun.