Vilja sameina skóla- og frístundastarf við Hagatorgið

„Við höfum bent á það að það væri dauðafæri að leggja saman þá aðila í Vesturbænum sem eru eða munu vera í húsnæðiskröggum og reyna að byggja öflugan kjarna í kringum þetta,“ segir Ómar Örn Magnússon, aðstoðarskólastjóri Hagaskóla. Vísir hefur flutt fregnir af húsnæðisvanda Hagaskóla að undanförnu. Ómar hefur viðrað hugmyndir sínar um að það myndi horfa til hagræðingar að sameina starfsemi ýmissa aðila sem koma nálægt skólastarfi barna í Vesturbænum á sama stað við Hagatorg.

„Það eru ekki bara við sem erum í húsnæðisþrengingum hér í Vesturbænum eða verðum í fyrirsjáanlegri framtíð í miklum húsnæðisvandræðum ef fer sem horfir varðandi þéttingu byggðar hér í Vesturbænum,“ útskýrir Ómar. „Heldur eru líka allavega tónlistarskólinn, lúðrasveitin og frístundamiðstöðin í húsnæðisþrengingum. Líka Melaskóli hérna við hliðina á okkur, það er mjög þröngt þar. Mér fyndist langeðlilegast að horfa á þetta allt í sameiningu,“ segir hann. „Við ættum að geta fengið öflugra skólastarf og öflugra starf hjá hinum aðilunum líka.“       

Hann bendir á að stór hluti barna og unglinga í hverfinu séu staðsettir við Hagatorgið í Melaskóla og Hagaskóla. „Stærsti hópur barnanna er hér yfir veturinn og yfir daginn, hér er börnunum safnað saman.“ En Melaskóli og Hagskóli eru stærstu skólarnir af þeim fjórum barnaskólum sem eru í Vesturbænum, hinir eru Vesturbæjarskóli og Grandaskóli.

Segir að nú verði að bregðast við

„Ég geri ráð fyrir því að það væri einnig hagstæðast að byggja upp á einum stað, hér er svosem pláss, starfsemi þessara aðila sem ég nefni fer vel saman og getur orðið dýnamískari ef hún er á einum stað heldur en dreift um allan Vesturbæinn,“ segir Ómar og bendir á að þá myndi allt hið svokallaða skutl sem fylgir tómstundum verða minna. „Skóladagurinn getur orðið samfelldari, allavega í skóla, frístunda og tónlistarnámi.“ 



Sérðu þá fyrir þér að nýta Hagatorgið, það stóra svæði sem fer þar til spillis?



„Það er náttúrulega mjög spennandi hugmynd. Það gengur auðvitað ekki upp með þá umferð sem er um það núna,“ segir Ómar en bendir á að mikið svæði sé til staðar annars staðar við Hagatorg. „Í einhverri útópíu væri mjög skemmtilegt að sjá Hagatorgið nýtt. Það er almennt ekki byggt á umferðareyjum en samt væri það spennandi ef umferðinni væri stýrt einhvern veginn öðruvísi í gegnum skólasvæðið.“ 

Hann segir að nú verði að fara að bregðast við. „Skólarnir eru orðnir mjög þröngir.“ 

„Við erum svo sannarlega tilbúin til samstarfs og sjáum fullt af tækifærum.“