Götusmiðjan opnar aftur á ný

Götusmiðjan, sérhæft meðferðarúrræði fyrir börn og unglinga sem komin eru út í heim vímuefna og afbrota, mun opna aftur innan tíðar. Henni var lokað fyrir fjórum árum síðan og síðan þá hafa yfirvöld ráðið illa við að uppfylla þörf fyrir neyðarvistun unglinga sem eru í verulegum vanda.

Meðferðarheimilinu Götusmiðjunni var lokað  í júnímánuði 2010 að kröfu barnaverndaryfirvalda. Afar stór orð voru látin falla og var málið umdeilt. Guðmundur Týr Þórarinsson, forstöðumaður meðferðarheimilisins, var meðal annars sakaður um hótanir í garð ungmennanna en ásökunum vísaði hann ávallt á bug.  Hann fór í meiðyrðamál í kjölfarið en dómur fellur í málinu í komandi mánuði. Guðmundur, betur þekktur sem Mummi, lætur ásakanirnar þó ekki á sig fá og hefur tekið ákvörðun um að opna meðferðarheimilið að nýju.

„Við erum eina vestræna borgin sem rekum ekki neyðarúrræði fyrir unglinga á götunni. Það er ekki til. Það er blóðugt að samfélagið bjóði ekki upp á stað þar sem þessir krakkar geta komið saman. Ég er búinn að horfa á eftir þessum krökkum í mörg ár og bara beint inn í fangelsi á fullorðinsárum. Mér finnst svo dapurt að þau séu látin afskiptalaus á götunni,“ segir hann.

Mummi tók þessa ákvörðun ásamt eiginkonu sinni nú um síðastliðna helgi og hafa viðbrögðin ekki látið sér standa og hafa fjölmargir haft samband við hann og lýst yfir ánægju sinni og þakklæti.

„Nú bara byrjar morgundagurinn og dagurinn í dag að hóa í fólk og dusta rykið af gömlum aðferðarfræðum og heyra í mönnum og sjá hvort við getum ekki mokað saman einhverjum pening svo við getum farið út á götu og hjálpað þessum krökkum,“ segir Mummi að lokum.