Algjörlega sturlað að stofna fréttavef

„Vefurinn er fyrir ungt fólk, og þegar ég tala um ungt fólk þá er ég að tala um fólk á aldrinum tuttugu til fjörutíu ára. Ég er sjálfur þrítugur og neita að trúa því að ég verði ekki ungur lengur eftir tíu ár,“ segir fjölmiðlamaðurinn Atli Fannar Bjarkason. Hann opnar í dag fréttavefinn nutiminn.is og lofar metnaðarfullum vef, fullum af fjölbreyttum fréttum.

„Þetta verða alls konar fréttir af því sem er að gerast núna, bæði harðar og mjúkar. Þessar helstu fréttir í bland við fréttir sem enginn er með. Framsetningin er fersk og Nútíminn er fallegur í öllum tækjum,“ segir Atli Fannar og hvetur fólk einnig til að finna Nútímann á Facebook.

Atli Fannar á að baki tíu ára reynslu í fjölmiðlabransanum og hefur bæði gegnt starfi ritstjóra Mónitors og fréttastjóra dægurmála á Fréttablaðinu. Aðspurður hvort það sé ekki áhættusamt að stofna fréttavef í dag segir Atli Fannar að það sé vissulega raunin.

„Það er auðvitað algjörlega sturlað. Ég var að leita mér að einhverju skemmtilegu að gera og ákvað að setja allan peninginn minn í þetta fyrirtæki með góða hugmynd að vopni. Ég treysti á að markaðurinn sé til í þetta og það lítur út fyrir það.“

Fjölmiðlamaðurinn hefur umkringt sig góðu fólki við gerð vefjarins.

„Í liði með mér eru frábærir pistlahöfundar. Logi Pedro úr Retro Stefson ætlar að skrifa um tísku, Alma í Charlies skrifar frá Los Angeles, Björg Magnúsdóttir, Þorsteinn Guðmundsson, Bibbi í Skálmöld og Bragi Valdimar deila öll snilld sinni. Svo detta fleiri pistlahöfundar inn jafnt og þétt. Og eflaust einhverjir út. Sá liður verður sprelllifandi.“