Íslenskir leikarar tjá sig: „Þetta snertir mann djúpt í hjartað“

Leikarans Robin Williams hefur verið minnst um gervalla heimskringluna síðan þau tíðindi bárust seint á sunnudagskvöld að hann hefði fundist látinn á heimili sínu í Kaliforníu. Íslenskir leikarar eru þar ekki undanskildir og enginn af þeim sem Lífið hafði samband við var ósnortinn af fregnum af dauðsfalli hans.

Hefur aldrei hlegið jafnmikið að nokkrum leikara

„Mér finnst þetta hræðilega sorglegt,“ segir Edda Björg Eyjólfsdóttir leikkona, en hún getur ekki gert upp á milli hlutverka Williams.

„Hann tengist svo barnæskunni. Aladdín var nú eitt, svo auðvitað Mrs. Doubtfire og hlutverk hans í Dead Poet Society. Svo sá ég klippu af honum þar sem hann hitti apann Koko sem varð ástfanginn af honum. Eftir það lýsti hann því hvað það er sérstakt þegar einhver af annarri tegund reynir við mann. Ég hef aldrei hlegið jafn mikið að einum manni, hann var algjör snillingur. Þetta snertir mann djúpt í hjartað af því að heimurinn er búinn að tapa þessari góðu sál.“ 

Úr augunum streymdi bæði sorg og gleði

„Ég hef alltaf tekið eftir því hvað það var mikil sorg í augunum á honum. Hann hefur algjöra sérstöðu, hann er svo svakalega tragískur á meðan hann er kómískur,“ segir Ingvar E. Sigurðsson leikari.

„Hann var svo ljúfur og góður. Á sama tíma og hann var tragikómískur streymdi úr augunum á honum endalaus gæska.“

Eftirminnilegasta hlutverk Williams að mati Ingvars er hlutverk hans í The Fisher King. „Það er langt síðan ég sá hana en ég man alltaf eftir honum í þeirri mynd.“

Williams alltof ungur til að deyja

„Það eru tvö hlutverk sem eru eftirminnilegust. Mrs. Doubtfire annars vegar, hann var góður í gervum og sniðugur í að skipta um karaktera. Og einnig hlutverk hans í Bird Cage, sem mér fannst mjög skemmtileg. Hann lék homma í myndinni og mér fannst hann gera það mjög vel.“

Laddi segist alltaf sjá eftir góðum mönnum.

„Hann var alltof ungur til þess að fara. Þetta er mjög sorglegt. Mér hefur fundist hann vera frábær grínisti.“ 

Grét hysterískt eftir að hafa séð Toys

„Eftirminnilegasta hlutverk hans að mínu mati var í kvikmyndinni Toys sem er jafnframt sorglegasta mynd sem ég hef séð. Ég fékk hysterískt grátkast og var í tilfinningalegu uppnámi í nokkra daga á eftir. Ég sá hana þegar ég var sex eða sjö ára og náði engan veginn utan um illsku heimsins,“ segir Saga Garðarsdóttir, leikkona.

Hún horfði síðan á hana á ný þegar hún var orðin 18 ára.

„Ég hélt að hún myndi ekki hafa svona áhrif á mig. En það var ekki rétt. Ég grátöskraði alla myndina. Hann var meistari í að búa til fallega tragikómíu, sprenghlægilegur en sympatískari en þúsund grátandi börn með kettlingaaugu.“ 

Robin Williams var aðeins 63 ára að aldri og á að baki farsælan feril í kvikmyndum. Hann var helst þekktur fyrir gamanleik en fékk einnig góða dóma fyrir þau hlutverk sem hann tók að sér á dramatískari vettvangi. 

Leikarinn féll fyrir eigin hendi en þrátt fyrir gott gengi í kvikmyndum hafði hann glímt við þunglyndi og áfengisfíkn um nokkurt skeið. Hér að neðan má sjá tímalínu af helstu atburðum úr lífi leikarans.