Kirkjumálasjóður greiðir 11 milljóna króna skuld við smið Þorláksbúðar

„Við vorum bara alveg lens – við gátum ekkert gert,“ segir Árni Johnsen, einn forsvarsmanna Þorláksbúðarfélagsins sem nú hefur fengið um 10,3 milljónir króna að láni og eina milljón í styrk frá Kirkjuráði til að gera upp við smið Þorláksbúðar.

Félag áhugafólks um uppbyggingu Þorláksbúðar í Skálholti skuldaði yfirsmið verkefnisins, Gunnari Bjarnasyni, um 11,3 milljónir króna fyrir vinnu og efni.

„Þetta var mikill áfangi að ná þessu. Að gera upp við Gunnar. Það var aðalskuldin,“ segir Árni Johnsen sem kveður upphaflega kostnaðaráætlun hafa veri 38 milljónir króna. Endanlegur kostnaður verði hins vegar um 30 milljónir. Með peningunum úr Kirkjumálasjóði sé nánast allt verkefnið uppgreitt.

Gert ráð fyrir endurgreiðslu

Áætlanir um fjármögnun Þorláksbúðar fóru út um þúfur eftir harða gagnrýni á sögulegar forsendur smíðinnar og staðsetningu búðarinnar nærri Skálholtskirkju.

„Fólk vildi ekki hafa húsið á þessum stað. Þorláksbúðarmenn segja það hafa gert að verkum að þeir sem voru búnir að lofa að leggja í verkefnið fjármuni kipptu að sér höndum,“ segir Ragnhildur Benediktsdóttir, framkvæmdastjóri Kirkjuráðs.

Kirkjan hefur að sögn Ragnhildar ekki lagt fé áður til Þorláksbúðar. Áðurnefnt 10,3 milljóna króna lán á Þorláksbúðarfélagið að endurgreiða með vöxtum á fimm árum. „Það er gert ráð fyrir að þeir muni standa skil á því,“ segir Ragnhildur sem kveðst telja að úr rætist hjá félaginu þegar neikvæð umræða um verkefnið dofni. „Fólk er bjartsýnt á að hægt verði að finna einhverja til að leggja peninga í verkefnið og seinna meir er hugsanlega hægt að leita til ríkisins með einhverja styrki.“

Púkar á fjósbitanum

Árni segist vona að málið sé allt komið í góðan farveg nú þegar kirkjan sé „með í dæminu“ og vinni með Þorláksbúðarfélaginu. Róðurinn hafi þó vissulega verið þungur.

„Þegar verið er að ráðast á menn sem eru að vinna svona áhugastarf og uppbyggingarstarf þá geta þeir ekkert hreyft sig á meðan fjóspúkarnir eru á bitanum. En það eru alltaf möguleikar og við tökum þetta í rólegheitunum,“ segir Árni.

Að sögn Árna hefur Þorláksbúð reynst „algjör gullmoli“ og Ragnhildur segir mannvirkið mikla listasmíð sem hafi mikið aðdráttarafl. „Ef maður dvelur dagpart í Skálholti sér maður að flestir útlendingur sem þar koma skoða Þorláksbúð.“