Vill mynda kynfæri

„Það er svo mikilvægt fyrir kynfræðsluna að sýna fjölbreytni kynfæranna,“ segir Sigga Dögg kynfræðingur en hún leitar að íslenskum sjálfboðaliðum í kynfæraljósmyndun 15. júlí. Það er þó nánast fullt í myndatökuna í júlí en önnur myndataka er fyrirhuguð í ágúst. „Ég hef fengið frábær viðbrögð en skráning í næstu myndatöku fer í gang fljótlega en það er hægt að fylgjast með skráningunni á vefsíðunni minni,“ bætir Sigga Dögg við.

„Þetta er algjörlega nafnlaust nema viðkomandi vilji koma fram undir nafni,“ segir Sigga Dögg en myndirnar munu birtast á vefsíðu hennar og verða meðal annars notaðar í kynfræðslu í grunnskólum. „Það eru til svo margar mýtur um kynfærin eins og um stærð á typpum og hvernig píkan á að líta út og þvíumlíkt,“ segir kynfræðingurinn en hún hefur unnið í kynfræðslu í fjögur ár og finnur fyrir vaxandi þörf fyrir slíkar myndir.

„Ég hef verið að vinna mikið með erlendar myndir en mér finnst mikilvægt að hafa íslensk kynfæri á myndunum. Það er ótrúlega mikill áhugi fyrir því að vera með í svona verkefni á Íslandi og þar sem þetta hefur verið gert víðs vegar um heiminn þá er eiginlega bara komið að okkur.“

Eina skilyrðið fyrir þátttöku í myndatökunni er að viðkomandi sé eldri en átján ára en Sigga Dögg býður alla aldurshópa yfir þann aldur hjartanlega velkomna í myndatökuna.

„Þátttakendur munu heldur ekkert hittast, þú ert bara boðaður í stúdíóið og þar verð ég ásamt ljósmyndara,“ segir kynfræðingurinn. Það eina sem þarf að gera er að senda tölvupóst á netfangið sigga@siggadogg.is til þess að skrá sig og fá tímasetningu en stefnt er að því að taka myndirnar 15. júlí. Þá er bók Siggu Daggar, Kjaftað um kynlíf við börn og unglinga –Fullorðnir ræða og fræða einnig væntanleg í verslanir í haust.