Hlaupa upp Esjuna ellefu sinnum í röð

Fjöldi fólks hyggst hlaupa upp Esjuna á laugardag í fjallahlaupinu Mt. Esja Ultra sem haldið er í þriðja sinn í ár.

Þrjú erfiðleikastig standa áhugasömum hlaupurum til boða en minnst er hægt að hlaupa upp Esjuna tvisvar sinnum, samtals fjórtán km leið með 1.200 metra hækkun.

Elísabet Margeirsdóttir næringarfræðingur er að skipuleggja hlaupið. „Þetta er alveg hægt. Það hafa næstum allir klárað sem hafa byrjað þetta og upplifunin hefur verið góð hjá fólki. Þetta er líka miklu skemmtilegra en það hljómar.“

Elísabet segir að fólk af öllum stærðum og gerðum hafi tekið þátt í hlaupinu. „Það er mikil stemning og þátttakendur eru duglegur við að hvetja hver annan áfram þegar þeir mætast á leiðinni. Flestir sem hafa farið í þetta hafa reynslu af lengri hlaupum og hafa hlaupið erlendis, til dæmis í fjallahlaupum. Aðalatriðið er að fara ekki of geyst af stað.“

Fimm manns hafa nú þegar skráð sig í ellefu ferða hlaupið en aðeins einn þeirra, Friðleifur Friðleifsson, hefur hlaupið það áður. Þá setti hann nýtt brautarmet í fyrra og hljóp tíu ferðir á níu klukkustundum og 43 mínútum.

„Tilgangurinn með hlaupinu er punktasöfnun. Keppendur geta fengið punkta sem gefa inngöngu í erfiðari hlaup erlendis,“ segir Elísabet.

Síðasta hringnum í stóra hlaupinu var bætt við vegna hertra skilyrða erlendis frá. Við það bættust sjö km við leiðina.

Átján ára aldurstakmark er í fimm hringja hlaupið en tuttugu ára aldurstakmark gildir í stóra ellefu hringja hlaupið. Hlaupahringurinn hefst við skógræktina við Esjuhlíðar en svo er hlaupið upp að steini á toppi Esjunnar og aðra leið niður.

Elísabet segir að búist sé við góðri þátttöku í hlaupið í ár en fjallahlaup hafa verið að auka vinsældir sínar jafnt og þétt. „Þetta er hrikalega skemmtilegt og stemningin verður góð.“