„Móðir mín hefur verið mín helsta fyrirmynd og hvatning í lífinu"

„Þessi vefsíða hefur það fyrst og fremst að markmiði að fjalla um líf og störf þess fólks sem komið er yfir miðjan aldur,“ segir Erna Indriðadóttir, ritstjóri og stofnandi vefsíðunnar Lifðu núna, sem var opnuð á fimmtudag.

„Fólki í þessum hópi fjölgar stöðugt og ef miðað er við fólk 55 og eldra telur hópurinn um 78 þúsund manns. Bara á næstu fimmtán árum á eftir að fjölga í honum um 35 þúsund manns. Þetta æviskeið er frábrugðið því sem lífið er þegar maður er um þrítugt og jafnvel fertugt. Mér fannst ekki óskaplega mikið fjallað um líf og störf fólks sem komið er yfir miðjan aldur og mig langaði að taka þátt í að efla þessa umræðu. Ég er fullviss um að fjölgun í eldri aldurshópum í samfélaginu mun leiða af sér gríðarlegar breytingar og við verðum að vera meðvituð um það,“ bætir Erna við.

Á vefsíðunni er að finna blöndu af fróðleik, fréttum og afþreyingu og segir Erna síðuna vera eins konar tímarit á vefnum þar sem hún tekur fyrir mál sem hún telur að séu athyglisverð og að þessi hópur hafi sérstakan áhuga á.

Hún tileinkar móður sinni, Kristínu Guðnadóttur, síðuna.

„Móðir mín hefur verið mín helsta fyrirmynd og hvatning í lífinu. Hún er í dag komin á níræðisaldur og hleypur út um allan bæ, lærir ensku, fer í leikhús, syndir og er alveg klingjandi klár í kollinum. Hún er minn helsti ráðgjafi í lífinu og mér fannst tilvalið að tileinka henni þessa síðu,“ segir Erna. Hún hefur fengið góð viðbrögð við síðunni.

„Það er mjög margt sem brennur á þessum hópi og ég verð vör við að fólki finnst einmitt hafa vantað umfjöllun um þessi mál.“