Kræklóttasti viðurinn kurlaður

„Við erum að senda samtals 500-550 rúmmetra af lerki frá Skógrækt ríkisins á Hallormsstað til Elkem á Grundartanga, á 12-14 bílum. Þar er það kurlað niður. Svo fara tveir bílar að auki með tré frá bændum á Fljótsdalshéraði í fyrsta skipti,“ segir Þór Þorfinnsson, skógarvörður á Hallormsstað.

Þór segir það fyrst og fremst kolefnið úr viðnum sem sótt er eftir hjá Elkem. Fyrirtækið kaupir einnig tré úr Eyjafirði, Borgarfirði og af Suðurlandi. „Þetta er auðvitað bara brot af því sem Elkem er að nota en við gerðum samning við fyrirtækið og reynum að skaffa því eins mikið og við getum.“

Þór segir söluna hjálpa til við að fjármagna kostnaðinn við nauðsynlega grisjun skógarins og því mjög jákvæða enda sé ekki um smíðavið að ræða.

„Þegar við grisjum ungan lerkiskóg í fyrsta skipti tökum við það allra lélegasta, það sem er tvístofna og kræklótt en skiljum eftir stærstu og beinustu trén,“ segir hann.